Ялгуулсан хэмээх модон морин жил айлсан ирлээ. Сар шинээс өмнө хэмээн сандралдан гүйлдэх бүсгүйчүүд, идээ шүүсээ бэлдэх гэрийн эздийн ажил өнөөдөр л нэг шувтарч байх шиг. Ерөөл айлдан мэндлэх монгол түмэн бие биедээ аз жаргал хүсэн, аль сайхан амттанаа ахас дээдэсдээ барина. Нар ургахаас өмнө босож, Лхам бурхны морийг ундаалах гэж гэрийнхээ тотгон дээр мөс тавих  монгол бүсгүй хотоо эртлэн цэвэрлэж, бурхандаа, уул усандаа цайныхаа дээжийг өргөнө. Өтгөс буурлаа хүндэлж насны эрэмбээр нь золгон хүндлэх монголчуудын баяр Цагаан сар ирлээ. Улиран одож буй жилдээ аз хийморь, ажил хөдөлмөр өөдрөг байснаа хуучлан, ирж буй жилийнхээ сайн сайхан бүгдийг хэлэлцэн, ерөөл айлдах хүн бүхэн аз жаргалтай харагдах аж. Хэдэн өдөр гарынхаа урыг шавхан байж оёсон монгол бүсгүйн бүтээл эзнээ хүлээн байна.  Давхар эмжсэн нь дээлнийхээ өнгөтэй хачин сайхан зохицож. Гэрийн эзэн, бяцхан үрс шинэ дээлээ өмсөөд магтах үгээ олж ядан баярлалдана. Монгол дээл, монгол хувцас тийм л сайхан.

Монгол ёс заншлаа дээдлэн, монгол дээлээрээ гоёж, монгол идээгээ зооглох түмэн олны  цог хийморь өөдрөг, аз жаргал, амжилт бүтээл нь ундарч байх болтугай. Элгээрээ энх амгалан, төрлөөрөө түвшин амгалан Сар шинэдээ сайхан шинэлээрэй.