Өнгөрсөн долоо хоногийн дэлхий дахинаа болж өнгөрсөн үйл явдлуудын тоймыг хүргэе. Үйл явдал, мэдээ мэдээллүүдийн халуун цэг нь АНУ-ын ерөнхийлөгчийн тангараг өргөх ёслол болоод Хойд Солонгосын цөмийн зэвсгийн туршилт байв. Хойд Солонгосын өнгөрсөн сард пуужингийн туршилт явуулж, хиймэл дагуул дэлхийн тойрог замд оруулж чадсан. Харин энэ удаагийн пуужингийн туршилт АНУ-руу чиглэсэн нь нэлээд анхаарал татаад буй.

Түүнчлэн долоо хоногийн онцлох мэдээлэлд Бээжингийн агаарын бохирдлыг асуудлыг шийдэж эхэлсэн болон Чехийн ерөнхийлөгч сонгогдсон, шөнийн клубт 250 орчим залуус харамсалтайгаар амь насаа алдсан зэрэг мэдээллүүд байлаа.

АНУ-ын ерөнхийлөгч тангараг өргөв

Өнгөрсөн 21-ний өдөр АНУ-ын төрийн тэргүүнээр ирэх ирэх дөрвөн жилийн турш ард түмнийхээ төлөө үнэнч шударга, ёс зүйтэй ажиллахаа Барак Хусейн Обама тангараглан үүрэгт ажлаа албан ёсоор хүлээн авчээ. Энэ өдөр мөн АНУ-ын дэд ерөнхийлөгч Жо Байдэн тангарагаа өргөсөн юм.

Ерөнхийлөгч Обама энэ удаад Ардчиллын бэлэг тэмдэг болсон цэнхэр өнгийн зангиа зүүж ард түмэндээ хүндэтгэл үзүүлсэн. Ийнхүү АНУ-ын 57 дахь удаагийн ерөнхийлөгчийн тангараг өргөх ёслолд 44 дэх ерөнхийлөгч тангаргаа өргөсөн билээ.

Тангарагийн үгийг хамгийн анх 240 жилийн өмнө АНУ-ын 16 дахь ерөнхийлөгч Авраам Линкольн бичиж түүнээс хойш үе үеийн ерөнхийлөгчид энэ л тангаргийн үгийг уншсаар ирсэн аж. Ингэхдээ ертөнцийн эзэн бурхнаас “Хүн бүрт эрх чөлөө, хүн бүрт аз жаргал авчрах төрийн тэргүүнийг эр зоригтой байхыг хүссэн гуйлтыг” илэрхийлж байдаг. Энэ удаагийн ерөнхийлөгчийн тангараг өргөх ёслол өмнө жилүүдийнхтэй харьцуулахад хэд хэдэн зүйлээр онцлог болсон юм. Үүнд анх удаа хоёр ариун библитэйгээр тангараг өргөсөн ба өмнөх жилүүдээс хамаагүй илүү төсөв зарцуулсан, Нэгдсэн улсын энэхүү бахархалт үйл явдлын гэрч болохоор Вашингтоны өргөн чөлөөнд 800 мянган хүн цугларсан зэргийг дурдаж болно. Ийнхүү дэлхийн том гүрнийг дараачийн дөрвөн жилд чиглүүлж, удирдан залах эрхэм үүрэгт ажлаа хүлээн авч, үнэнч шударга ажиллахаа амлан тангараглав.

Хойд Солонгос цөмийн зэвсэг туршина

НҮБ-ын Аюулгүйн зөвлөл энэ сарын 22-нд БНАСАУ цөмийн зэвсгийн эсрэг хориг арга хэмжээ авсан. Харин үүнийг Хойд Солонгосчууд ихээхэн хүндээр тусгаж авч байгаа. Тэд цөмийн хөтөлбөрөө зогсоох талаар ямар нэгэн яриа хэлцэл явуулахгүй гэсэн байр суурьтай байгаа юм.

Хойд Солонгос өнгөрсөн сарын 12-нд “Ынха-3” пуужин хөөргөж хиймэл дагуулаа дэлхийн тойрог замд амжилттай оруулж чадсаны дараагаар хоёр Солонгосын харилцаа дахин муудах төлөв ажиглагдаж буй.

Тэрхүү пуужинг энхийн зорилгоор хөөргөсөн ч түүнийг нь баллистик пуужингийн туршилт байсан гэх сэжиг төрүүлж байсныг Өмнөд Солонгосын мэргэжилтнүүдийн пуужин унасан хэсгүүдэд хийсэн шинжилгээгээр баталсан билээ.

Тиймээс НҮБ-ын Аюулгүйн зөвлөл энэ сарын 22-нд Пхеньяны эсрэг хориг арга хэмжээг чангалсан хэрэг. Хоригийн хариуд Хойд Солонгос АНУ-ын эсрэг чиглэсэн цөмийн туршилтаа хийнэ гэдгээ мэдэгдээд байгаа нь дэлхий дахинд шуугиан дэгдээгээд байна.

Чех улс шинэ ерөнхийлөгчөө сонголоо

Милош Земан ирэх таван жилд Чехийн ерөнхийлөгчийн албыг хашихаар боллоо. Сонгогчдын 54.8 хувийн санал авсан Милош Зеван “тарж бутарсан үндэстнийг” нэгтгэх ажлыг өөрийн гол зорилт гэж зарлаад, “сонгуульд хэний төлөө санал өгснөөс үл шалтгаалан бүх 10 сая чех хүний ерөнхийлөгч болох” бодолтой байгаагаа мэдэгдсэн юм.

Земаны гол өрсөлдөгч Гадаад хэргийн сайд Карел Шварценберг 45.18 хувийн санал авч, ялагдсанаа хүлээсэн байна.

Милош Земан 1996 онд тэр парламентын доод танхим болох Снемовнагийн дарга болсон юм. 1998 оны долдугаар сарын 22 хүртэл энэ өндөр албан тушаалд ажиллаж байгаад, ерөнхий сайд болсноор уг албан тушаалаа орхижээ.

Бээжин агаарын бохирдлын эсрэг хөдөлж эхлэв

Бээжингийн агаарын бохирдолттой тэмцэх ажлын хүрээнд тээврийн хэрэгслийн яндангаас гардаг утаан дахь хорт бодисуудын агууламжийг зохицуулдаг Евро-5 стандартад дүйх стандартыг хоёрдугаар сарын 1-нээс нэвтрүүлэхээр төлөвлөж байна. Энэ нь Бээжин-5 шинэ стандарт байх юм. Үүнд эхний ээлжинд авто машинуудыг бодлогоор зохицуулах арга орж байна. Одоо ашиглагдаж байгаа машинууд нь шинэ стандартын үйлчлэлд хамаарахгүй аж. Бээжин-5 стандартад тохирохгүй дизель хөдөлгүүртэй тээврийн хэрэгслийг хоёрдугаар сарын 1-нээс Бээжинд худалдахгүй, бүртгэхгүй, харин бензинээр явдаг хөнгөн тэрэгийг гуравдугаар сарын 1-нээс энэ жагсаалтад оруурахаар болжээ. Бээжин хотын эрх баригчид янз бүрийн хэрэгцээ болон янз бүрийн худалдан авах чадвартай жолооч нарт чиглэсэн бөгөөд Бээжин-5 стандартад нийцсэн 1300 гаруй төрлийн тээврийн хэрэгслийн жагсаалт гаргажээ. Бээжин хотын Нийслэлийн хүрээлэн байгаа орчныг хамгаалах газрын үзэж байгаагаар, шинэ стандарт үр нөлөөтэй үйлчилвэл, Бээжин-4 стандарттай харьцуулвал нэг машины гаргах азотын ислийг барагцаалвал 40 хувиар бууруулна гэж бүрнээ найдаж болох ажээ.

Шөнийн клубт гал гарч 250 орчим хүний амь үрэгдэв

Ням гаригийн шөнө Бразилийн Санта Мариа хотын “Kiss” шөнийн клубт гал гарсны улмаас 250 орчим хүн амиа алдлаа хэмээн AFP агентлаг мэдээлэв. Хотын цагдаагийн газрын ахмад Клеберсон Брэйда Бастианелло “Бид шархдаж, бэртсэн хүмүүсийн тоог нарийн гаргаагүй байна. Амиа алдагсдын тоо 240-д хүрээд байгаа хэмээн мэдээлсэн байна. Шинжээчид галын шалтгааныг тогтоохоор ажиллаж байна” гэв. Орон нутгийн радиогийн уламжилснаар хэрэг явдал болох үед тус клубээр 1000 орчим хүн үйлчлүүлж байсан аж. Тэдгээрийн дийлэнх нь оюутан залуус байжээ. Шөнийн клубын галт үзүүлбэрийн үеэр хананаас эхлэн гал гарсан байна. Энэ үеэр үйлчлүүлэгчид үймж сандран гарч хаалган дээр шахцалдаан үүсч хүмүүс гарч чадаагүй аж. Хэргийн газарт ажилласан гал сөнөөгчдийн ярьснаар амиа алдагсдын дийлэнх нь угаартаж нас барсан байжээ.

2000 оны арванхоёрдугаар сарын 25-нд БНХАУ-ын Люян хотын шөнийн клубт гал гарсны улмаас 309 хүн амиа алдаж байсан. Мөн 2004 онд Аргентины нийслэл Буэнос-Айрес хотын шөнийн клубт гарсан галын улмаас 194 хүн амиа алдсан бол хамгийн сүүлд 2009 оны арванхоёрдугаар сарын 5-нд ОХУ-ын Пермь хотын шөнийн клуб дотор салют буудуулснаас хуванцар дээвэрт гал авалцаж тэнд үйлчлүүлж байсан 152 хүн тус тус амиа алдаж байсан харамсалтай тоо баримт бий.

Э.Мөнхнасан