Бичлэгийн тоо 372
/Визний зөрчилтэй, гадаад улсад амьдарч ажиллаж байгаа Монгол иргэдээ эх орондоо эргэж ирэхэд нь өршөөл үзүүлээч/
1997 он … Усан онгоц, галт тэрэг, автобус унаа … Явж болох бүх л аргаар элэг нэгт Монгол ахан дүүс минь эх орноо орхин харийн нутгийг зорьж эхэлжээ.
Хамгийн эхний асуулт бол ЯАГААД . Өнөөдөр бид мөнгөтэй болж, боломжтой болчихож, эрх чөлөөт Америкийг мөрөөдөн тэмүүлэх болжээ. Харин тэр үед тийм байгаагүй Орос, Эрээнээс өөр гадаадад явж үзээгүй Монголчууд хар ажил хийж гэр бүлээ тэжээхийн тулд, 2 өрөө байртай ЭРГЭЖ ирэхээр алсыг зорьж байсан. Тэднийг тийм сайхан орчин угтаагүй, түрүүлээд алхчихсан гутлын мөргүй, харанхуй бүдэгхэн газар хэл усгүй газардаж байсан хүмүүс бол бидний нүүдэлчид байсан. Харанхуй шөнө утасны аппарат тэвэрч айлын шон луу авиран, хулгайн салаагаар хүүхдийнхээ хоолойг сонсож мэгшсэн эхийн зүтгэлээр үйлдвэр ч үгүй аялал жуулчлал үгүй уул уурхай ч үгүй Монгол улс хэдэн жил дэнсэлсэн юм.
Дараагийн асуулт бол ЯАЖ. Ихэнхи нь буруу арга хэрэглэсэн. Хэн байх нь хамаагүй визтэй пасспорт л байвал болдог шахам байсан. Төстэй царайтай хүний пасспортыг ашиглах, пасспортаа оёдлоор нь салгаж зурагтай нүүрийг нь солих гэх мэт ямар нэгэн аргаар хил нэвтэрчихдэг л байсан. Үүнийг хийдэг тусгай хүмүүс гарч ирэхэд илүү олон хүмүүс явах боломжтой болж ихэнхи хүмүүс нь яаж гарснаа ч мэдээгүй байдаг. Чингисийн Монгол визтэй улаан пасспорт өвөртлөөд ороод ирэхэд учрыг нь ололгүй оруулчихсан улсууд ч олон бий.
2013 он … ОДОО АСУУДАЛ ЮУНД БАЙНА ?
10 гаруй жил өнгөрчээ, анх очсон Монголчууд маань хөлөө олчихсон байна. Олон жил гүрийсний эцэст бичиг баримт, ногоон карт, бизнестэй болж. Харамсалтай нь мөрөөдөл болсон ногоон карт өөрийнх нь нэрэн дээр дарагдсангүй. Гэхдээ хамаа байхгүй, 10 жил болоод л ирсэн амьдрал харийн нутагт хэнээс ч гуйхгүй амьдарч чадна, харин ЭХ ОРОНДОО л ирж чадахгүй зовно. Америк биш Монгол явахаас айна. Эцэг эх, ангийн найзууд, багынх нь дурсамж энд байхад хичнээн сайхан газар ч хүнийх л байдаг. Азаа үзэн нисээд ирэхэд Монгол улсын хууль тэдэнд үйлчилж эхэлнэ. Мөрдөн байцаах, тагнуул гээд бүх шатны байцаалтанд орно, эрүүгийн хуулийн заалттай цаасан дээр гарын үсэг зурна, ойр дотны 2 хүн нь батлан дааж гаргана, ногоон карт, виз зөвшөөрөлтэй улаан пасспорт улсын мэдэлд очно.
Өнөөдөр тэд гэмт хэрэгтэн. Үр хүүхдээ тэжээсэн гэмт хэрэгтэн, эцэг эхээ асарч тойлсон гэмт хэрэгтэн, эх орноо валютаар угжсан гэм буруутан, өөрийгөө зольж амьдралын төлөө зүтгэсэн нүгэлтэй хүмүүс. Тэд уул нь улсын мөнгөөр сургуульд сурчихаад эргэж ирээгүй хувиа хичээгчид биш, эх орондоо 2000 долларын цалин авах боломжтой болсон энэ үед заавал алсыг зорих ойлгомжгүй хүмүүс биш, тэд бол Монголд сарын цалин 300 мянга хүрэхгүй хүнд хэцүү үед энэ тоог 3 аар үржүүлж эх орондоо илгээж байсан баатрууд. Өөрсдөө айлын хажуу өрөө, харанхуй контейнэрт амьдран үр хүүхэд, үлдсэн хэдээ байранд жаргааж байсан гавьяатай хүмүүс.
Хуулинд би хайртай, учир нь хууль байдгийн ачаар бид олуулаа зохицож амьдардаг. Гэхдээ хууль бол чулуу биш, сугалж боломгүй шигдсэн хад биш, хууль хүний төлөө бодит амьдрал дээр тулгуурлан үйлдэгддэг, шаардлагатай бол өөрчилж засаж бас болдог.
Эрхэм ерөнхийлөгч өө, энэ захиаг сонгуулийн сурталчилгааны үеэр самардах оноо болгож бичсэнгүй. Бүрэн эрх, боломжит ажлынхаа хүрээнд нүдээ олсон энэ өөрчлөлтийг хийгээсэй гэж хүслээ.
Иргэн,
Чадраабалын Ганжавхлан
Үүдээ нээгээч Ерөнхийлөгч өө !!!