Төвдийн цагаачлалын Засгийн газрын Ерөнхий сайд Самдан Ринбүүчи “Бээжинтэй Төвдийн асуудлаар хийх дугуй ширээний уулзалт ойрын үед болно. Дээрхийн гэгээнтэн Төвдийн ард түмэнд тустай аливаа боломж бүрийг ашиглаж, тодорхой үр дүнд хүрэхийг хичээх хэрэгтэй гэсэн удирдамж өгсөн” гэлээ. Дугуй ширээний уулзалтад Төвдийн цагаачлалын Засгийн газрыг төлөөлөн оролцох Лодойгара, Галсанжалцан нар даваа гаригт Бээжинд хүрэлцэн ирлээ. Өмнөх уулзалт өнгөрсөн гуравдугаар сард Төвдөд олныг хамарсан үймээн гарсны дараа болсон. Албан бус энэ уулзалтыг Бээжин олон улсын шахалтаар хийсэн гэж хэлэхэд болно. Энэ удаагийн уулзалтыг нэлээд эрт товлосон боловч Сычуаньд газар хөдөлж ихээхэн хохирол учирсны улмаас хойшлоод байсан юм. Бээжингийн зүгээс уулзалт хаана, хэзээ болох, ямар асуудал хэлэлцэх, хэдэн цаг үргэлжлэх талаар тодорхой мэдээлэл хийсэнгүй. БНХАУ-ын Засгийн газар Бээжингийн бодлогыг эсэргүүцсэн самууныг Далай ламтан зохион байгуулсан хэмээн буруутгасан. Дээрхийн гэгээн үүнийг эрс няцаагаад “Миний бие Төвдөд тусгаар тогтнол биш, ердөө л өөртөө засах эрхийг хүсэмжилсэн” гэсэн билээ. Лхас болон бусад томоохон суурин газар болсон үймээний үеэр 19 хүн алагдаж, 116 хүн баривчлагдсан гэсэн албан ёсны тоо баримтыг хүний эрхийн төлөө тэмцэгчид эрс үгүйсгэж, бодит байдал дээр хамаагүй их байгаа хэмээн удаа дараа мэдэгдсэн. Нөлөө бүхий гүрний удирдагчид, өндөр албаныхан дугуй ширээний уулзалт болох гэж байгаад сэтгэл хангалуун байна. АНУ-ын Төрийн нарийн бичгийн дарга Кондализа Райс “Далай ламтан Төвдийн ярвигтай асуудлаар хэл амаа ололцож чадахаар эелдэг хүн гэж бид үздэг. Түүнд Бээжин хүндэтгэлтэй хандаасай гэж уриалмаар байна” гэлээ. Олимпийн нээлтэд оролцохгүй хэмээн Бээжинг “айлгаж” байгаа Францын Ерөнхийлөгч Н.Саркози “Ажил хэрэг амжилттай болбол миний бие олимпийн нээлтэд оролцохоос татгалзах зүйлгүй” гэсэн байна. Өнгөрсөн долоо хоногт Төвдөд гадаадын жуулчид очихыг зөвшөөрсөн ч сэтгүүлчдэд тавих хяналт чанга хэвээр байна. |