Өнгөрсөн мягмар гаригт Өмнөд Солонгосын нийслэл Сөүл хотноо олныг хамарсан үймээн болж, жагсаалд оролцсон таван иргэн болон цагдаагийн нэг ажилтан амь үрэгдсэн харамсалтай явдал болов. Энд нийт 23 хүн бэртэж, гэмтсэн байна. Тус улсын Ерөнхийлөгч Ли Мөн Бак уг үйл явдлыг нэн даруй шалгахыг зохих хүмүүст үүрэг болгожээ. Энэхүү сөргөлдөөнийг зохион байгуулсан 40 гаруй хүн хуучин барилгыг эзэлж аван дэлбэлнэ хэмээн сүрдүүлсэн байна. Тэдэн рүү цагдаагийнхан дайрч эхлэх үед байранд гал гарчээ. Эдгээр тэмцэгчид нөхөн төлбөрийн мөнгөө ахиухан өгвөл байрыг орхино гэсэн шаардлага тавьсан байна. Уг сөргөлдөөн нь улс төрийн хямралтай байдалд заналхийлсэн явдал боллоо. Ерөнхийлөгч цагдаагийн даргыг сольсны дараагаас л сөргөлдөөн эхэлсэн бөгөөд шинээр томилогдсон цагдаагийн дарга нь Засгийн газрын эсрэг тэмцэгчдэд хатуу харгис ханддаг гэж олноос шүүмжлэл хүлээж байсан хүн юм. Сөүлийн Ёнгсан дүүрэгт болсон уг сөргөлдөөний үеэр байшинд гал гарахад цагдаа нар дээвэр дээр гарахыг оролдсон байна. Гэрчүүдийн ярьж буйгаар офицерууд кранаар өргөж авчирсан контейнер дотроос босогчдын эсрэг усны их буугаар шүршжээ. Харин босогчид цагдаа нарын эсрэг хүчил, тоосго, гольфын бөмбөг зэргийг шидсэн байна. Галыг унтраах гэж гал командынхан нэг цагийн турш ажиллажээ. Телевизээр хийсэн мэдэгдэлдээ Өмнөд Солонгосын Ерөнхий сайд энэ явдалд маш их харамсч байгаагаа илэрхийлээд, үймээн дэгдээсэн хүмүүст хатуу арга хэмжээ авахаа мэдэгдсэн байна. Э.Оджаргал