| ||
Ховд аймгийн Үенч, Булган, Алтай сумын нутагт орсон цас 1,5 метр хүрч, уг сумдын 17 мянга гаруй хүн аймгаасаа холбоо тасарчээ. Мөн Ховд, Эрдэнэбүрэн, Мянгад, Дөргөн, Дуут, Чандмань зэрэг суманд их хэмжээний цас орсноос 540 мянган мал хотноосоо гарч чадахгүй, 80 мянга гаруй толгой мал хорогдоод байгаа. Энэ тухай мэдээллийг УИХ-ын гишүүн, Ховд аймгийн нутгийн зөвлөлийн дарга С.Бямбацогт болон Алтай, Үенч сумын нутгийн зөвлөлийн дарга нар өчигдөр сэтгүүлчдэд хийсэн юм. Тэдний тайлбарласнаар аймгийн хэмжээнд өвөлжилт хүндэрч, гамшгийн хэмжээнд хүрсэн тул Улсын Онцгой комисс яаралтай арга хэмжээ авахаас өөр аргагүй байдалд хүрээд буй. Байгалийн гамшигт үзэгдлээс гадна Алтай, Үенч сумынхан цахилгаангүй байгаагийн улмаас харилцаа холбоо тасарч, нисдэг тэрэг очихоос өөр аргагүй байдалд хүрсэн. Малчид нөхцөл байдлаас шалтгаалан малаа нядалж эхэлсэн. Одоогоор нэг сая гаруй толгой мал нядлаад байгаа тул худалдан авах талаас төрөөс арга хэмжээ авч ажиллахыг нутгийн зөвлөлийнхөн хүслээ. Г.Дарь |