Ерөнхий сайд С.Баяр Монгол Улсын 2009 оны төсвийн тухай хуульд өөрчлөлт оруулах тухай хуулийн төслийг УИХ-ын дарга Д.Дэмбэрэлд өчигдөр өргөн барилаа.

Энэхүү төсвийн тодотголд урсгал зардлыг бууруулах хүрээнд хүүхэд бүрт cap тутам олгодог 3000 төгрөгийг үргэлжлүүлэн олгож, Монгол Улсыг хөгжүүлэх сангаас улирал тутам олгодог 25 мянган төгрөгийг Монгол Улсыг хөгжүүлэх сангийн үлдэгдэлтэй уялдуулах, шинээр гэрлэгсдэд олгож байгаа 500 мянган төгрөгийг 300 мянга болгож, 6.6 тэрбум төгрөгөөр зардлыг бууруулахаар тусгажээ. 

Мөн төрийн нийт албан хаагчийн цалинг гуравдугаар сарын нэгнээс эхлэн нэг жилийн хугацаанд 20 хувиар, төрийн өндөр албан тушаалтны цалинг 30 хувиар, нийт 98.6 тэрбум төгрөгөөр бууруулахаар Засгийн газар шийджээ.

Түүнчлэн төсөвт байгууллагын бараа, үйлчилгээний зардлыг багасгаснаар 25.3 тэрбум төгрөг хэмнэх нь зүйтэй гэж үзсэн байна. Орон тоо нэмэхгүй байх, орон тооны хязгаараас хэмнэгдсэн болон сул байгаа орон тоо, тэтгэвэрт гарч буй иргэний оронд шинээр ажилтан нэмж авахгүй байх, зарим төрлийн нийгмийн халамжийн тэтгэмжийн давхардлыг арилгах зэргийг мөн оруулсан байна. Харин шинээр төрсөн хүүхдэд олгох 100 мянга, алдарт эхийн одонтой эхчүүдэд олгох мөнгөн тусламжийг үргэлжлүүлэн олгохоор болжээ.

Хөрөнгө оруулалтыг хумих тухайд, 2009 онд шинээр эхлэх хөрөнгө оруулалтын төсөл, арга хэмжээг хойшлуулах, өмнөх онд барихаар төлөвлөөд 2009 онд шилжиж байгаа боловч тухайн төслийн тендер зарлагдаагүй, барилгын ажлын гэрээ байгуулагдаагүй, гэрээ байгуулсан боловч барилга угсралтын ажил эхлээгүй, санхүүжилт хийгдээгүй хөрөнгө оруулалтын төсөл, арга хэмжээ, барилга байгууламжийг хойшлуулах зэрэг арга хэмжээг авснаар улсын төсвийн хөрөнгө оруулалт батлагдсанаас 130 гаруй тэрбум төгрөгөөр буурна гэж тооцжээ. Бүхэлдээ “Төсвийг тэнцвэржүүлэх бодлого” баримталсан уг тодотголын төслийг УИХ-ын ээлжит бус чуулганаар хэлэлцэнэ.

Э.Адъяа