Өсвөр үеийнхний олимпийн анхны аварга Баатарзоригийн Батцэцэг
Уншсан 6469 vote 0 2010.08.17 11:56:53
Сингапурт хөшгөө нээгээд буй өсвөр үеийнхний анхдугаар олимпийн наадмын хоёр дахь өдөр (VIII.16) чөлөөт бөхийн эмэгтэйчүүдийн 60 кг-д хүч үзсэн Баатарзоригийн Батцэцэг урамтай сайхан барилдсаар алтан медаль хүртлээ. Есөн охин өрсөлдсөн энэ жинд Б.Батцэцэг “В” хэсэгт орж, Шинэ Зеланд, Гвиней, Нигери, ОХУ-ын тамирчдыг хожин шигшээд шалгараад Энэтхэгийн Поожа Дандаг мөн оноогоор ялан шагналын дээд тавцанд гарах болзлоо хангажээ.
Налайхын уугуул энэ охин Узбекистаны Ташкентад болсон олимпийн сонгон шалгаруулах тэмцээнээс хүрэл медаль хүртэж, Сингапурыг зорих эрхээ авч байсан билээ. Ийнхүү олимпийн наадмын аварга хосоороо төрсөн “Бээжин-2008”-аас хойш тив, дэлхийн тэмцээнүүдээс аварга заавал төрдөг болсон уламжлал үргэлжилсээр. Б.Батцэцэгийн жинд хүрэл медалийг ОХУ-ын тамирчин Светлана Лмпатова хүртсэн байна.
