Ирэх сарын эхний долоо хоногт буюу манай цагаар 3 сарын 6-нд тулааны спортын ноён оргил UFC 196 бидийг хүлээж байна.
АНУ-н Лас Вегас хотоос бидэнд хүрэх тус тулаанд аваргын бүсийн 2 тулаан байгаа бөгөөд сахилгагүй супер од Конор МакГрегор тулалдах гэж байгаа нь дэлхий нийтийн анхаарлын төвд байна. UFC 196 Веласкез – Вердум гэсэн хүнд жингийн бүсийн тулаан байсан бөгөөд 2 тулаанч ээлж дараалан бэртэж тулаан цуцлагдсан нь МакГрегор – Дос Анжос гэсэн супер тулаан болох нөхцөлийг бүрдүүлж өгсөн. Конор МакГрегор UFC 194 дээр өдөн жингийн (66кг) босоо аварга Жосе Алдог эхний үеийн 13 дахь секундэнд хүнд цохилтоор буулгаж авч гайхамшиг бүтээсэн. Улмаар хормын төдийд жин өгсөж дээд жингийн (70кг) аварга Бразилын Рафаел Дос Анжос-той супер тулаан хийхээр товлогдсон. Энэ нь Ирланд залууд эрсдэл ихтэй, аз туршсан тэр юу ч болохгүй гэж ихэнх хүмүүс ярьж байгаа ч МакГрегор өрсөлдөгчөөс нуруугаар өндөр ба хурд, техник дутаад байх зүйл байхгүй. Харин Дос Анжос-н хувьд аваргын бүсээ UFC 185 дээр Антони Петтис-ээс булаан авсан. Улмаар хамгийн сүүлийн тулаанаа өнгөрөгч оны 12 сарын 19-нд Ковбой Серроне-г хүнд цохилтоор буулгаж авч бүсээ хамгаалаад амжсан. Дагуул тулаанд эмэгтэйчүүдийн өдөн жингын аваргын бүсийн тулаан Холм – Тате нарын хооронд болно. Ялалт тус бүрээ секунтээр хэмжиж байсан супер од Ронда Роузиг хөлийн хүнд цохилтоор буулган авсанаас хойш Холли Холм гэх нэр олны анхаарлын төвд өртөж эхэлсэн. Бокс суурьтай Холм аваргын бүсээ хамгаалах анхны тулаанаа хуучин Strikeforce-н аварга шилдэг тулаанч бүсгүй Миша Тате-н эсрэг хийх болно. Хагас хүнд (93кг) жинд Ultimate Fighter – 19-н ялагч Корей Андерсон эсрэг UFC-н хуучин цэрэг Том Лавлор, үзэгчидийн хамгийн их үзэх дуртай тулаанч Диего Санчес-н эсрэг шилдэг барилдаанч Жим Миллер зэрэг гайхамшигт тулаануудыг зөвхөн UFC 196-аас.
