Д.Цахилгаан: Миний хүүд тулгаж байгаа ял нь хоёр хөршөө Монголын эсрэг дайсагнадаг гэж хэлсэнтэй адил байна
Уншсан 6767 vote 0 2010.08.26 11:09:53
УИХ-ын Тамгын газрын Гадаад бодлогын зөвлөх Ц.Жаргалсайханыг эх орноосоо урвасан хэрэгт буруутган, Чингэлтэй дүүргийн шүүх 17 жилийн хорих ял оноосон. Түүний аав Онц бөгөөд Бүрэн эрхm Элчин сайд, ахмад дипломатч Д.Цахилгаан өчигдөр сэтгүүлчдэд хандан мэдээлэл хийсэн юм.
Түүний
хүүд оноосон Эрүүгийн хуулийн 79.1-д “Монгол Улсын иргэн тус улсын
тусгаар тогтнол, үндэсний аюулгүй байдал, батлан хамгаалах хүчин чадалд
хохирол учруулах зорилгоор гадаад улсын тагнуулын албанд элссэн, төрийн
нууцыг гадаад улс, түүний тагнуулын албанд шилжүүлэн өгсөн, Монгол Улсын
эсрэг дайсагнасан үйл ажиллагаа явуулдаг гадаад улсын байгууллагатай
хамтран ажилласан, дайны байдалд буюу дайн бүхий байдал зарласан үед
дайсны талд шилжин орсон бол арван зургаагаас хорин таван жил хүртэл
хугацаагаар хорих ял шийтгэнэ” гэж заасан байдаг
Д.Цахилгаан
“Миний хүүг тагнуул хийсэн хэрэгт буруутгасан. Хэзээ, хаанахын
тагнуулын байгууллагад элссэн тухай нотлох баримтаа надад болон Монголын
ард түмэнд үзүүлэхийг хүсэж байна. Мөн ямар баримт бичиг дамжуулсан нь
үндэсний эрх ашиг, аюулгүй байдалд яаж нөлөөлсөн болохыг баримтаар
үзүүлэхийг шаардаж байна” гэв. Улсын нууц гэж нэрлээд байгаа бичиг
баримт, илтгэх хуудас нь бүгд хэвлэл мэдээллийн хэрэгслээр олон нийтэд
ил тод болсон материал байсныг тэр онцоллоо.
“Ц.Жаргалсайханыг УИХ-ын дарга С.Дэмбэрэлийн урилгаар БНХАУын Төрийн зөвлөлийн Ерөнхий сайд Вэнь Зябаогийн энэ оны зургадугаар сард хийсэн айлчлалын материалтай холбоотой зүйлийг дамжуулсан гэж буруутгаж байна.
Ц.Жаргалсайханыг энэ оны зургадугаар сарын 3-ны орой манай улсад суугаа ОХУ-ын ЭСЯ-ны ажилтан Василийтэй хамт байхад нь саатуулсан. Дамжуулсан гэх айлчлалын материал орос найзынх нь цүнхэнд байсан нь түүнийг буруутгах үндэс болсон” гэж Д.Цахилгаан ярилаа. Айлчлал зургадугаар сарын 1-нд болж, 2-ны өдрийн бүх хэвлэл, сонинд дэлгэрэнгүй гарсан учир улсын нууцад хамааралгүй аж.
-Танай хүү Василийг хэдэн жилийн өмнөөс мэддэг юм бэ. Одоо тэр хүн хаана байгааг та сонирхов уу. Тагнуулынхан ямар нэгэн мэдүүлэг авсан болов уу?
-Тийм хүнтэй нөхөрлөж байсныг энэ асуудал гарснаас хойш би сонслоо. Тэр залуугийн аав Монголд 10 гаруй жил ажилласан дипломатч учир би сайн танина. Унаган орос хэлтэй хүн орос залуутай найзалж байсан юм билээ. Одоо хаана байгааг би хэлж мэдэхгүй.
-Монгол Улсыг төлөөлж та олон жил гаднын оронд дипломат алба хашиж байсан. Дамжуулсан гэх айлчлалын материал улсын нууцад ордог юм уу?
-Ийм материал улсын нууцад хамаардаггүй. Миний хүү ажил албандаа алдаа дутагдал гаргасан байхыг би үгүйсгэхгүй. Өндөг шиг өөгүй байсан гэж хэлэхгүй. Гагцхүү эх орноосоо санаатай урваж, ард түмнийхээ аюулгүй байдалд нөлөөлөх хэрэг хийгээгүй, хийх ч хүн биш.
Энэ асуудал зөвхөн манай хүүгийн бус хоёр хөршөө эвгүй байдалд оруулсан бүдүүлэг асуудал болж байна. Монгол Улсын гадаад харилцааны хөдөлшгүй баримтлах зарчимд хоёр хөрштэйгээ тэргүүлэх зэрэгт хамтран ажиллана гэж заасан. Миний хүүг буруутгасан үйлдлээрээ хоёр хөршөө Монголын эсрэг дайсагнасан бодлого барьдаг гэж хэлж байгаатай ялгаагүй боллоо.
Зөвхөн миний хүүгийн бус хоёр орны харилцаанд нөлөөлөх хэмжээний асуудал босож байгаа учир би маш их санаа зовж байна.
Ухвар мөчид бодлоор нэг урвагчийг илрүүлж, зэрэг дэв ахих гэсэн бодолтой хүн ийм хэрэг үүсгэсэн байж болох юм. Энэ хэрэг нь нэг хүний асуудал биш гэдгийг ойлгох хэрэгтэй.
