“Rio
Tinto” компанийн Зэсийн группийн олон улсын үйл ажиллагаа хариуцсан
ерөнхийлөгчөөр Б.Болдыг томилжээ. Тус компанид сүүлийн гурван жил
зөвлөхөөр ажилласан тэрбээр ирэх зургадугаар сарын 3-наас үүрэгт ажлаа
хүлээн авах бөгөөд Лондон хотод суурьшин ажиллах юм байна. “Rio
Tinto”-гийн Зэсийн группийн гүйцэтгэх ерөнхий захирал Жан Себастьян Жак
“Б.Болд Австрали, Өмнөд Африк, Папуа-Шинэ Гвиней, Индонез, Аляск дахь
төслүүдийг хариуцан, Зэсийн группийн тодорхой хөрөнгийг борлуулах үйл
ажиллагааг хянах, хөрөнгө оруулалтын багцыг нэгтгэхэд оролцох үүрэгтэй
ажиллана. Мөн Зэсийн группийн хөрөнгө оруулалтын багцыг нэгтгэхэд
анхаарна” гэж ярьжээ.
Мөн “Rio Tinto”-гийн Монгол Улсыг хариуцсан захирал, “Оюутолгой” компанийн ерөнхийлөгч бөгөөд гүйцэтгэх ерөнхий захирал Камерон МакРей “Бизнесийн хөрөнгө оруулалтын тааламжтай орчныг Монголын эрх ашигтай хослуулах чиглэлээр ажиллаж байгаа төр болон иргэний нийгмийн байгууллагууд Б.Болдоос зөвлөгөө авдаг” хэмээн ярьсан байна.
Дашрамд дурдахад, Б.Болд нь Монгол Улсын Техникийн их сургуулийг аж үйлдвэрлэлийн инженерчлэлийн бакалавр, АНУ-ын Коннектикут мужийн Брижпортын их сургуулийг Бизнесийн удирдлагын магистр зэрэгтэй төгссөн аж. “Алтан Дорнод Монгол” компанид гүйцэтгэх захирлын албан тушаалтай тэрбээр өмнө нь “Newcom” группийн гүйцэтгэх захирал байснаас гадна Нью-Йорк, Лондон, Москва хотноо “JP Morgan” компанид удирдах албан тушаал хашсан арвин туршлагатай. Бас Монголын уул уурхайн үндэсний ассоциацын ТУЗ-ийн гишүүн, Монголын бизнесийн зөвлөлийн Гүйцэтгэх зөвлөлийн гишүүн зэрэг сонгуульт алба хашдаг юм. Тэрбээр “Дэлхийд тэргүүлэгч “Rio Tinto” компанид ажиллах болсондоо баяртай байна” хэмээн өгүүлжээ.
