Зүүн хойд Азийн эдийн засгийн форумын залуу лидерүүд өнөөдөр чуулна
Уншсан 7020 vote 0 2010.08.16 11:08:29Залуу лидерүүдийн тав дахь удаагийн хөтөлбөрийн нээлт өнөөдөр МУИСийн Олон улсын харилцааны сургуулийн “Алтан аргамж” танхимд болно. Нээлтийн ажиллагаанд Зүүн хойд Азийн Эдийн засгийн форумын тэргүүн Ли Жэй Чо, ГХЯ-ны Азийн газрын захирал Б.Ганболд, МУИС-ийн ОУХС-ийн захирал Б.Хулдорж болон албаны хүмүүс оролцох аж.
2006 оноос эхлэн АНУ-ын Зүүн Хойд Азийн Эдийн засгийн форум залуу лидерүүдийн хөтөлбөрийг зохион байгуулж эхэлсэн бөгөөд энэ удаагийн буюу тав дахь удаагийн хөтөлбөрөө энэ сарын 14-29-нд Улаанбаатар хотноо МУИС-ийн ОУХС, Зүүн хойд Азийн нийгэмлэг, Ази Номхон далайн институттэй хамтран бүс нутгийн залуу лидерүүдийг оролцуулан зохион байгуулах юм.
Мөн АНУ-ын Зүүн хойд Азийн Эдийн засгийн форум, Монгол Улсын Ерөнхийлөгчийн Тамгын газар, Засгийн газар, Зүүн хойд Азийн нийгэмлэг, Ази Номхон далайн институт хамтран наймдугаар сарын 26-27-нд Төрийн ордонд 19 дэх удаагийн Зүүн хойд Азийн Эдийн засгийн форумын ээлжит хуралдаан зохион байгуулна.
Хуралдааны нээлтийн ажиллагаанд Ерөнхийлөгч Ц.Элбэгдорж, Ерөнхий сайд С.Батболд болон БНХАУ, ОХУ, БНСУ, Японы нэр хүндтэй албаны зочид, төлөөлөгчид оролцох аж. Тус хуралдааны гол зорилго нь бүс нутгийн эдийн засгийн хамтын ажиллагааг хөгжүүлэхэд чиглэсэн болно.
ЗХАЭЗФ нь 1992 онд АНУ-ын Хавай мужид байгуулагдсан бөгөөд тэр цагаас хойш Зүүн хойд Азийн нийгэм, эдийн засгийн хөгжлийн асуудлаар судалгаа шинжилгээ, яриа хэлэлцээг явуулж ирсэн бүс нутгийн томоохон байгууллага юм гэж Гадаад харилцааны яамны Хэвлэл мэдээллийн хэлтэс мэдээллээ.
