Мэргэжлийн сүмогийн түүхэн амжилт болох 69 дараалсан ялалтыг 11 дүгээр сард эвдэхээр зэхэж буй ёкозүна Хакүхо шинэ, өвөрмөц бэлтгэл хийж эхлэхээ зарлалаа. Өдөр бүр сонин хэвлэлээр рекорд тогтоох уу хэмээн бичигсээр, стрессэн дунд өвдөг шороодолгүй түрүүлсэн ч Намрын тэмцээнд ихэд ядарсан гэх. Тиймээс дахин хэвлэл мэдээллийн дарамтанд орохгүйн тулд бие махбодь, сэтгэл санаагаа хатуужуулахаар шийджээ.
Хакү- хотой доод зиндаанд байхаас нь нөхөрлөсөн Йокохама хотын нэгэн сүмийн хамба лам Ичигава “Аварга хүрхрээн дор зогсож бэлтгэл хиймээр байна хэмээн ярьсан. Одоо бид тохирох хүрхрээ хайж байна” гэж сэтгүүлчдэд ярьсан гэнэ. Түүний эвдэхээр зэхэж буй 69 дараалсан ялалтыг тогтоосон домогт аварга Фүтабаяма 24 өдөр хүрхрээнд цохиулан бэлтгэл хийж байсан гэх бөгөөд Хакүхо өрсөлдөгчийнхөө аргаар амжилтыг нь булаахаар бэлтгэж байгаа бололтой.
Мөн Хакүхо 70 дараалан ялсан тохиолдолд Фүтабаяма аваргын гэр музейд түүний эд зүйлсийг тавих төлөвлөгөөтэй байгаа аж. Хакүхо 11 дүгээр сарын тэмцээний өмнө домогт Фүтабаямагийн төрсөн нутагт очиж, гэр бүлийнхэнтэй нь уулзах бодолтой байгаагаа ч нуусангүй. Хакүхогоос гадна өвөрмөц бэлтгэл хийдэг байсан бөхчүүд бий.
Ёкозүна Хокүтоүми хүчний дасгал хийснийхээ дараа -190 градусын хүйтэн хөргөгчинд ордог байсан гэнэ. Тэрбээр халсан булчингаа хөргөөд дахин дасгал хийхэд бяр ордог хэмээн сургадаг байсан ч дуурайх хүн олдоогүй гэдэг.
