Бичлэгийн тоо 3,329
Манай боксчид Германы “Химийн цом” тэмцээнээс нэг алт, хоёр хүрэл медаль хүртсэн талаар бид өмнө нь мэдээлсэн.
Тамирчид залгуулаад Чехийн Усти над Лабем хотноо жил бүр болдог
уламжлалт тэмцээнд хүч сорьжээ. Энэ тэмцээнд ч манайхан амжилттай
тулалдаж, хоёр алт, нэг мөнгөн медалийг өөрийн болголоо. Хэдхэн хоногийн
өмнө Германд аваргалсан гавьяат тамирчин Н.Төгсцогт энэ тэмцээнд ч
өрсөлдөгч бүрээ итгэлтэй ялав. Тэрбээр тэгшитгэлд Ирландын М.Конлоныг
14:8, шөвгийн наймд Голландын Э.Ле Крусийг 15:13, хагас шигшээд Хятадын
Юүо Лунхайг, финалд нутгийн боксчин Э.Агателаныг тус тус хожжээ.
Өмнөх тэмцээнд медалийн гадна үлдсэн З.Энхзориг Чехийн рингэнд амжилттай тоглож, төрийн дууллаа эгшиглүүлсэн байна. Тэрбээр Италийн Д.Фестосиг 12:4-өөр хожиж медалийн болзол хангаад, дараа нь Ирландын Р.Хикей, Чехийн З.Чадлек нарыг дараалан хожиж, алтан медаль хүртсэн юм. Түүнчлэн Б.Түвшинбат Хятадын Х.Билэг (13:10), Чехийн Р.Билек (15:6) нарыг хожиж финалд үлдээд Унгарын Б.Баскайд хожигдон мөнгөн медаль дээр буужээ.
Харин
манай Г.Ган-Эрдэнэ, А.Эркин, Д.Отгондалай нар эхний даваандаа дийлдэн
медальгүй хоцорсон юм. Энэ тэмцээнээр Монголын боксчдын Европын цуврал
өндөрлөж байна.