Говийн заан гэгдэх тэмээг алдаршуулж, спортын шинэ төрөл бий болгон, тоо толгойг нэмэх зорилгоор “Тэмээн поло” фестивалийг “Монголын тэмээн поло, спорт уралдаан, аяллын холбоо” ТББ-аас сүүлийн арван жил зохион байгуулж буй. Энэ жилийн “Тэмээн поло-2013” өвлийн фестиваль өнгөрсөн амралтын өдрүүдэд Цонжин болдог цогцолборт болсон юм. Нээлтийн арга хэмжээнд ҮХАА-н сайд Х.Баттулга оролцож, “Энэ фестиваль нь ховордоод буй хоёр бөхт тэмээний тоо толгойг өсгөх зорилготой. Монгол Улс 1950-иад онд хамгийн олон буюу 900 мянган тэмээтэй байсан. Харин 2002 онд тоо толгой нь цөөрч 200 мянган тэмээтэй болсон бол өдгөө 300 мянга болон өслөө” гэв.

Харин ССАЖ-ын сайд Ц.Оюунгэрэл “Төрийн бус байгууллагын нэг ажил байсан арга хэмжээ энэ жилээс үндэсний уламжлалт аялал жуулчлалын брэнд болох юм. Түүнчлэн тогтмол зохион байгуулах газар, өдөр, хөтөлбөртэй болно” гэлээ. Уг арга хэмжээнд зургаан аймгийн 20 гаруй сумын тэмээчид 150 гаруй тэмээтэй ирсэн байв. Фестивалийн үеэр тэмээн поло улсын аваргын тэмцээн, хурдан тэмээний гурван насны уралдаан болсноос гадна сайхан тэмээтэй хосыг шалгаруулсан юм.

Тэмээн поло нь ерөнхийдөө хоккейтэй төстэй. Тэмээн дээрээс цохиурын тусламжтайгаар бөмбөгөө цохин эсрэг багийн хаалганд оруулж тоглодог. Нэг талдаа найман минут, нийт 16 минут тоглоно. Талбай дээр дөрвөн гишүүн гарах бөгөөд ээлжийн нэг тоглогчтой. Тоглох үед тэмээнийхээ хөлийг цохичихдог тул хөлийг нь хамгаалж боодог аж.

Сонирхуулахад, дэлхийд 500 мянган хоёр бөхт тэмээ байдгийн 300 мянга нь Монголд байдаг аж.