- Тэрбээр өрсөлдөгчөө есөн саналын илүүгээр ялав -

Ерөнхийлөгчийн сонгуулийн тулааны нүргээн сонсогдож эхлэв. Засгийн эрхийг ээлжлэн барьсан улс төрийн хүчнүүдийн ойрын жилүүдийн хувь заяа энэ сонгуулиар шийдэгдэх тул эрх баригч хийгээд сөрөг хүчин ихээхэн ач холбогдол өгч байгаа юм. АН Ерөнхийлөгчийн сонгуульд Ц.Элбэгдоржийн нэрийг дэвшүүлнэ, түүнтэй дүйх өрсөлдөгч үгүй гэж үзэж байгаа бололтой. Сүүлийн нэг сарын дотор улс төрийн хүрээнд энэ итгэлийг ганхуулахуйц үйл явц өрнөж, АН-д итгэх сонгогчдын итгэл бага багаар буурч буй нь тус намынхны төдийгүй Ерөнхийлөгчид дахин нэр дэвших Ц.Элбэгдоржийн сэтгэлийг чилээж эхэлжээ. МАН өнгөрсөн бямба гаригт ээлжит бага хурлаа хуралдуулж, 2013 оны Ерөнхийлөгчийн сонгуульд нэр дэвшигчээ тодрууллаа.

Морин цагт эхэлсэн тус хуралд намын Бага хурлын 310 гишүү ний 227 нь оролцож, намын зохион байгуулалт, 2013 оны Ерөнхийлөгчийн сонгуульд нэр дэвшиг чээ тодруулах, мөрийн хөтөлбөр батлах, сонгуулийн үйл ажиллагааг зохион байгуулах эрхийг намын Удирдах зөвлөлд өгөх зэрэг асуудал хэлэлцжээ.

С.Баяр, У.Хүрэлсүх нар МАН-ыг тодорхойгүй хугацаагаар орхисноос хойш нэрлэх лидергүй шахам болсон тус намын Удирдах зөвлөл Ерөнхийлөгчийн сонгуульд МАН-ын дарга, УИХ-ын гишүүн Ө.Энхтүвшин, УИХ-ын гишүүн Б.БатЭрдэнэ, Д.Оюунхорол, Д.Лүндээжанцан нарыг нэр дэвшүүлж, нууц санал хураалт явуулсан байна. Санал хураалтын дүнгээр Ө.Энхтүвшин 91, Б.Бат-Эрдэнэ 91, Д.Оюунхорол 28, Д.Лүндээжанцан 17 хүний санал авсан тул олонхийн санал авсан хоёр нэр дэвшигч дээр дахин санал хураалт явуулахад нэр дэвшигчид 113:113-аар санал дахин тэнцэж нэг саналын хуудас хүчингүйд тооцогджээ. Шөнийн 24.00 цаг өнгөрч байхад санал хураалтыг гурав дахь удаагаа явуулахад Б.Бат-Эрдэнэ 117, Ө.Энхтүвшин 108 санал авч, есөн саналын илүүгээр ялсан УИХ-ын гишүүн Бадмаанямбуугийн Бат-Эрдэнэ ирэх сард болох Монгол Улсын Ерөнхийлөгчийн сонгуульд өрсөлдөх эрхтэй болсон байна. Бага хурлын уур амьсгалаас анзаарахад тус намынхан дөмөгхөн санал авах хүнээ Ерөнхийлөгчийн сонгуульд нэр дэвшүүлье гэж шийдсэн бололтой. “Олны анхаарлын төвд байсан нэр дэвшигч нь УИХ-ын гишүүн Б.Бат-Эрдэнэ байсан бол, Ө.Энхтүвшинд намын даргын нэр хүнд нь түүнтэй эн тэнцүү өрсөлдөхөд хүргэсэн” гэж эх сурвалжууд өгүүлэв.

Харин нэр дэвшигч Б.Бат-Эрдэнэ “Сонгууль бол ардчиллын үнэт зүйл, шударга ёсны илэрхийлэл юм. Энэ удаагийн сонгуульд МАН Ерөнхийлөгчид нэр дэвшигчээ хамгийн түрүүнд тодрууллаа. Сонгуульд оролцох улс төрийн бусад нам, нэр дэвшигч болон сонгуулийн штабад хандан хэлэхэд “Шударга, маргаанг үй сонгууль зохион байгуулах зарчмыг барьж ажиллана. Мөн Ерөнхийлөгчөөр сонгогдвол шударга ёсыг сахиж, ард түмнийхээ эв нэгдлийн илэрхийлэгч болж ажиллана” гэсэн байна. Энэ үеэр МАН-ын дэргэдэх Нийгмийн ардчилал-Монголын эмэгтэйчүүдийн холбооны Удирдах зөвлөлийн гишүүн Б.Долгор “Нэр дэвшигчийн материал, бусад зүйлийг хуулийн дагуу нягт нямбай бэлдээрэй. Нэр дэвшигчийн нэрийг татуулах хэмжээний алдаа гаргаж болохгүй“ гэж сануулсан гэнэ. МАН-ын араас тун удахгүй УИХ-д суудалтай АН, МАХН, МҮАН, ИЗНН нэр дэвшигчээ тодруулах биз ээ. Гэхдээ нэр дэвшигчид бүрэн тодроогүй ч Ерөнхийлөгч Ц.Элбэгдоржийн далд сурталчилгаа хэдийнэ эхэлсэн.

Ийм эгзэгтэй цагт Ц.Элбэгдоржийн дөрвөн жил зүтгэж бий болгосон нэр хүндийг татваргүй бүсэд нээлгэсэн дансаа “мартсан” УИХ-ын дэд дарга асан С.Баярцогтын дуулиан сэвтээх болсон нь таагүй. Түүнчлэн Үндсэн хууль зөрчсөн, төрсөн дүүгийнх нь охин, өөрийнхөө шууд удирдлага дор ажилладаг ЗГХЭГ-ын дэд дарга Г.Дэнзэнгийн гэргий Г.Уянгын компани Тавантолгойн орд газрын гаалийн хяналтын бүсийн үйлчилгээ үзүүлэх тендерт ялагчаар тодорсон гэх хэл аманд өртсөн Ерөнхий сайд Н.Алтанхуягийг тойрсон таагүй үйл явдал АН-ын нэр дэшигчийг шаналгаж буй юм. Ц.Элбэгдоржийн араас ойрын өдрүүдэд МАН-ын нэр дэвшигч Б.Бат-Эрдэнийн ил далд сурталчилгаа эхлэх байх.