Хүн амын шилжилт хөдөлгөөн ихсэж, оршуулгын газартай хаяа дэрлэн буух айлуудын тоо нийслэлд нэмэгдсээр байна. Тиймээс уг асуудлыг цэгцлэх үүднээс Улаанбаатар хотын захирагчийн ажлын албаны Орчны бохирдол хог хаягдлын менежментийн хэлтсээс журам боловсруулж, өчигдөр болсон нийслэлийн Засаг даргын зөвлөлийнхөнд танилцуулав. Нийслэлд 4000 орчим га талбайд оршуулгын газрын зөвшөөрөл олгосон байна.
Гэтэл сүүлийн үед шарилыг ил задгай болон зөвшөөрөлгүй газарт тавих явдал ихэсчээ. Өнөөдрийн байдлаар нийслэлд 400 мянган хүний шарил байдгийн 30 хувь нь зөвшөөрөлгүй газарт байгаа гэнэ. Үүнийг хязгаарлах үүднээс Улаанбаатар хотын Захирагчийн ажлын алба “Улаанбаатр буян” компанитай хамтран ажиллахаар болов.
Оршуулгын газар хөрс, ус, агаарын бохирдолд сөрөг нөлөө үзүүлдэг бөгөөд жил бүр 10 га-гаар талбай нь нэмэгддэг байна. Энэ талаар Орчны бохирдол хог хаягдлын менежментийн хэлтсийн дарга Ч.Дэлгэрбаяраас тодруулахад “Манай улсад чандарлах үйл ажиллагаа явуулдаг ганц компани байдаг.
Бид зөвшөөрөлгүй газарт нэгэнт орчуулчихсан шарилын холбогдох хүмүүсийг олж тогтоохоор ажиллаж байна. Хэрэв ар гэрийнхэн нь олдохгүй бол “Улаанбаатар буян” компани чандарлаж, хөрөнгө мөнгийг нь нийслэл, дүүргийн төсөвт тусгуулна.
Эхний ээлжинд 25 мянган шарилыг нүүлгэх шаардлагатай байгаа” гэв.
Нийслэлийн Засаг даргын зөвлөлийн хурлаар уг журмыг дэмжиж, Иргэдийн төлөөлөгчдийн хурлаар хэлэлцэхээр болов.