Улаанбаатар хотод метро байгуулах ЖАЙКА-гийн урьдчилсан төслийг өчигдөр болсон НИТХ-ын ээлжит хуралдаанаар хэлэлцэж, баталлаа. Хэрэв уг төслийг Засгийн газраас дэмжвэл 2020 он гэхэд нийслэлчүүд хот дотроо метрогоор зорчдог болно.
Японы ЖАЙКА-гийн төслийг сонгосон шалтгаан нь өртгийн хувьд хямд бөгөөд өмнө хэрэгжүүлсэн гурван том төсөл амжилттай хэрэгжиж, чанартай болсных хэмээн нийслэлийн Засаг даргын орлогч Л.Гантөмөр тайлбарлав. Төсөлд тусгаснаар нарийвчилсан зураг, ТЭЗҮ- ийг ирэх сараас эхлэн нэг жил, зургаан сарын хугацаанд бэлэн болгож, барилга угсралтыг 2016 онд эхлүүлэх гэнэ.
Толгойтоос Амгалан хүртэл нийслэлийн баруун, зүүн хэсгийг холбосон 17.7 км замыг барихдаа 25 дугаар эмийн сангаас Зүүн дөрвөн зам хүртэлх хэсгийг газар доогуур явуулах аж. Үлдсэн хэсгийг өргөгдсөн, дүүжин хэлбэрээр барихаар тусгажээ. Урьдчилсан тооцоогоор уг бүтээн байгуулалтад нийт 1.5 тэрбум ам.доллар шаардагдах юм байна. Хэрэв төслийг ЖАЙКА гүйцэтгэхээр болбол Японы Засгийн газраас 600 сая ам.долларыг хөнгөлөлттэй зээл хэлбэрээр олгох санал тавьжээ. Харин 200 сая ам.долларыг олон улсын хөрөнгө оруулалтаар, үлдсэнийг нь манай улс өөрсдөө гаргах боломжтой гэнэ. Уг мөнгийг төсөл хэрэгжих хүртэлх хугацаанд төлөвлөж, жил бүр улсын төсөвт суулгавал дарамтг үйгээр хөрөнгө босох боломжтой хэмээн үзэж байна. Ингэж чадвал жилд 70 орчим сая ам.доллар төсөвлөхөд хангалттай аж.
Эхний тооцоогоор метро ашиглалтад ороход иргэд нийтийн тээврээр 45 минут явах газарт 15 минутын дотор, 600 төгрөг төлөөд хүрэх гэнэ. Төслийн хүрээнд 2017-2018 онд инженер техникийн 280 мэргэжилтэн бэлтгэх бөгөөд метротой болсноор 159 мянган ажлын байр бий болно гэж тооцжээ. Ази тивд одоогийн байдлаар Вьетнам, Лаос, Монгол, Камбож гэсэн дөрвөн орон л метрогүй байсан бол уг жагсаалтаас хасагдах боломж манай улсад ийнхүү нээгдэж байна.