Монголын циркийн жүжигчид өнгөрсөн арванхоёрдугаар сарын 24-нөөс энэ сарын 5-ны хооронд Италийн Ром хотноо болсон “Golden Circus” наадмаас мөнгө, хүрэл медаль хүртжээ. 29 дэх удаагаа зохиогдсон тус наадамд 13 орны 60 гаруй циркийн жүжигчид 30 үзүүлбэрээр өрсөлдсөнөөс Монголын үндэсний циркийн жүжигчин Э.Лхагва-Очир тэнцвэрийн үзүүлбэрээр мөнг өн медаль хүртсэн бол, ЦЕГ-ын дэргэдэх “Сүлд” чуулгын уран нугараач Г.Нямгэрэл, ҮДБЭЧ-ын О.Цэцэглэн нар хос нугаралтаар хүрэл медалийн эзэн болсон байна. Харин алтан медалийг Италийн морьтой үзүүлбэр хүртжээ. Э.Лхагва-Очир “Энэ тэмцээн төрөл бүрт байр эзлүүлэлгүй, нийтэд нь гурван байр эзлүүлсэн. Манай улсаас гурван циркчин оролцож, хоёр байрыг нь эзэллээ. Энэ нь Монголын циркийн хөгжил ямар шатанд байгааг харуулж байна” хэмээсэн. Энэхүү наадам нь чансаагаараа “Monte Carlo”, “Cirque de demain” тэмцээний дараа орох A зэрэглэлийн томоохон тэмцээн аж.