Жүдогийн 73 кг-ийн жинд С.Ням-Очир, эмэгтэйчүүдийн чөлөөт бөхийн 63 кг-ийн жинд С.Батцэцэг, боксын 64 кг-ийн жинд У.Мөнх-Эрдэнэ нар хүрэл медаль, боксын 52 кг-ийн жинд Н.Төгсцогт, жүдогийн -100 кг-ийн жинд Н.Түвшинбаяр нар мөнгөн медаль хүртэж, монгол түмнээ баярлуулсан. С.Ням-Очир, Н.Төгсцогт, У.Мөнх-Эрдэнэ нар гадаад орон болон хөдөө орон нутагт явж байгаа тул шагнал гардуулах ёслолын ажиллагаанд оролцож чадсангүй.
Ёслолын ажиллагаанд оролцсон гавьяат тамирчин Н.Түвшинбаяр “Олимпийн медальтны энгэрийн тэмдгээ авсандаа их баяртай байна. Олимпод амжилтанд хүрэхэд тусалж дэмжсэн бүх хүн, ялангуяа шигшээ багийн хамт олондоо баярлалаа гэж хэлмээр байна” гэж ярилаа. Сэтгүүлчид түүнийг шигшээ багийн дасгалжуулагч болсон талаар асууж, дахин барилдахгүй юм биш биз хэмээн сонирхлоо. Н.Түвшинбаяр “Одоо шигшээ багтаа дасгалжуулагч хийж байна. Олимпийн үеэр авсан гэмтэл эдгэж байгаа. Би мэдээж дахиад барилдана. Монголынхоо нэрийг дахин гаргана гэж бодож байгаа” гэж хариулсан.
Харин
гавьяат тамирчин С.Батцэцэг “Тусалж дэмжиж байсан бүх хүн, багш
дасгалжуулагч, багийн хамт олон, Монголын ард түмэндээ талархаж
байгаагаа илэрхийлье. Удахгүй “Mongolian open” олон улсын тэмцээн
Улаанбаатар хотод болох гэж байна. Бэлтгэлдээ гарсан байгаа. Түрүүлэхийн
төлөө зүтгэх болно” гэв. Уг энгэрийн тэмдгийг олимпийн медальт бүх
тамирчинд олгодог бөгөөд олимпийн наадмын медалийг орлох бүрэн
батламжтай. Тэмдэг тус бүр нь өөрийн сериал дугаартай, давтагдашгүй,
алт, мөнгө, хүрэл гурван төрөлтэй.