Монголын ноолуураар бэлэн хувцас үйлдвэрлэдэг залуус АНУ-ын Нью-Йоркт амьдар даг агаад тэд хэдийнэ “Naadam Cashmere” брэнд бий болгоод амжжээ. Диедерик Рижсемус, Мэтью Сканлан хэмээх их сургуулийн хоёр оюутан амралтаараа Монголд ирээд буцахдаа “Naadam” компанийг байгуулах санаагаа олсон гэнэ. Анхандаа тэд үүнийгээ “галзуу” санаа хэмээн үзэж байсан бол одоо тансаг зэрэглэлийн брэндийг болгож чаджээ. Тэд нүүдэлчний соёл Монголд л үлдсэн хэмээн цахим хуудсандаа бичсэн байв.

“Naadam Cashmere” өнгөрсөн сарын дундаас энэ сарын 15 хүртэл бүтээгдэхүүндээ хямдрал зарласан юм билээ. Тухайлбал, эрэгтэй юүдэнтэй цамцыг энэ хугацаанд 350-аас 226, 250-аас 190, 240-өөс 160 ам.доллар болгон хямдруулсан байв.

“Naadam” компанийн үүсгэн байгуулагч, гүйцэтгэх захирал Мэтью Сканлан “Наадам гэдэг нэр Монголын малчдын талаарх ойлголтыг дэлхий дахинд өгөх болов уу. Тэд тансаг гэх тодотголтой ноолуурынхаа ачаар багагүй ашиг хүртэх боломжтой. Бидний олж буй доллар бүрээс цаг уурын хүнд нөхцөлд амьдардаг, бүтээгдэхүүний маань түүхий эдийг бэлддэг малчид ашиг хүртэж байгаа гэдэгт итгэлтэй байна” хэмээн ярьжээ. Учир нь тэд орлогынхоо 10 хувийг Дэлхийн банкны Малчдыг дэмжих хөтөлбөрт хандивладаг юм байна. Хямдрал зарласан дээрх хугацаанд тэд 20.000 ам.долларын бүтээгдэхүүн борлуулахаар төлөвлөсөн гэнэ. “Naadam”-ынхан түүхий эд болох ноолуураа Монгол, ӨМӨЗО-оос авч, сүүлийн үеийн технологи, тоног төхөөрөмжөөр үйлдвэрлэлээ явуулдаг аж.

Тодруулбал, манай улсын Хэнтий, Сүхбаатар, Баянхонгор, Хөвсгөл, Завхан, Архангай, Булган аймгаас ноолуур бэлтгэдэг юм байна. Уг брэндийн загвар зохион бүтээгчид худалдан авагчдыг өөрсдийнх нь найз шиг хандаж хувцасны дизайнаа гаргадаг нь давуу тал гэнэ. Тэд одоогоор малгай, цамц, оймс зэргийг зах зээлд борлуулж байгаа юм. Бүтээгдэхүүнийх нь дийлэнхийг эрэгтэй ноолууран цамц эзэлдэг бөгөөд дунджаар 200-350 ам.доллараар борлуулдаг юм билээ.

Дулааныг сайн хадгалдаг, чанартай, хүний биед ямар нэгэн сөрөг нөлөөгүй, орчин үеийн загвартай хэмээн тэд өөрсдийн цахим хуудсанд бүтээгдэхүүнээ тодотгожээ. Иймээс ч зар сурталчилгаандаа “Сайхан харагдах нь чухал. Гэхдээ хувцас тань таатай байдлыг мэдрүүлэх нь хамгаас илүү” хэмээх үгийг ашигладаг аж. Тэд цөөн тооны, загварлаг, тансаг бүтээгдэхүүн үйлдвэрлэхээр зорьдгийг өөрсдийн логог арьсан дээр хэвлэдгээс харж болохоор.