Германы “Germanwings” компанийн “Airbus A320” онгоц Францын нутаг дэвсгэрт Альпийн нурууны ойролцоо осолдсон харамсалтай хэрэг гарлаа. “Airbus A320” онгоц Испанийн Барселона хотоос Германы Дюссельдорф хотын чиглэлд нисэж байжээ. Францын зам, тээврийн сайдын мэдээлж буйгаар Airbus A320 орон нутгийн цагаар 10:00 цагт хөөрсөн бөгөөд 10:53 цагийн үед радарт харагдахаа больсон гэнэ. Радарын мэдээллээс үзэхэд онгоц 11500 метрийн өндрөөс 2100 метр хүртэл ердөө найман минутын дотор өндрөө алдсан байжээ. Уг онгоцонд 144 зорчигч болон багийн зургаан гишүүн зорчиж явсан ба ослын улмаас бүх зорчигч амиа алдсан байна.

                                                  /Мария Раднер/                                       /Олег Бряк/

Одоогоор зорчигчдын мэдээллийг нягтлан шалгаж байгаа ба эхний мэдээллээр зорчигчдын 67 нь Германы иргэд байсны 16-н ахлах ангийн сурагч, мөн Испанийн 45 иргэн байжээ. Түүнчлэн дуурийн дуучин Мария Раднер, Олег Бряк сууж явсан гэж “BBC” агентлаг мэдээллээ. Мария Раднер нөхөр, хүүхдийн хамт явж байсан гэнэ. Одоогийн байдлаар онгоцонд аль улсаас хэчнээн иргэн зорчиж явсан бүрэн тодорхой болоогүй байгаа аж. Ямартай ч Герман, Франц, Испани, Турк, Бельги, Голланд, Колумба, Австрали гээд нийтдээ найман улсын иргэд зорчиж явсан гэх мэдээлэл байгаа юм.

Ослын шалтгааныг урьдчилсан байдлаар цаг агаартай холбон тайлбарлаж байна. Онгоц осолдсон ууланд аврах ажиллагаа явуулж байгаа ч одоогоор амьд үлдсэн хүн олдох найдлага тун бага байна.Эрлийнхэн онгоцны сүйрсэн газрыг олж очсон боловч онгоц бүхэлдээ бутарч юу ч үлдээгүй байна.Онгоцны хоёр хар хайрцгийн нэгийг нь олж хар хайрцгийг судлахаар Парисийн мэргэжилтнүүдэд өгсөн байна.Нислэгийн үеэр цаг агаар хэвийн байсан ба ослын шалтгааныг юунаас болсныг судалж байгаа аж.