Умард Солонгосын эсрэг шинэ хориг тавилаа
АНУ-ын зүгээс БНАСАУ-ын эсрэг хориг арга хэмжээнүүдийг шинээр авсан тухай өрнөдийн хэвлэлүүд мэдээлж эхэллээ. Хориг арга хэмжээ авах тухай тушаалд Ерөнхийлөгч Барак Обама гарын үсэг зурсан байна.
Үүгээр Умард Солонгосын цөмийн хөтөлбөрийн эсрэг авсан хориг арга хэмжээнд энэхүү шинэ хоригууд нэмэгдэн орж байгааг Төрийн департаментаас албан ёсоор зарлалаа.
Умард Солонгосын удирдагч Ким Чен Уны амь насыг Америкийн тусгай албаны ажилтнууд хороож буйг хошин өнгө аясаар харуулсан "Ярилцлага" хэмээх кино энэхүү шинэ хориг арга хэмжээнд хүчтэй нөлөө үзүүллээ хэмээн ажиглагчид дүгнэж байна.
"Ярилцлага" киног олон нийтэд үзүүлэхийг Умард Солонгосын албаныхан эрс эсэргүүцэж буйг илэрхийлсний дараа Sony компани хакеруудын халдлагад өртсөн юм.
Улмаар кинотеатруудад гаргасан тохиолдолд есдүгээр сарын 11-нийх шиг аймшигт халдлага үйлдэх болно хэмээн заналхийлснээр Америкийн олон кинотеатрууд "Ярилцлага" киног гаргахаас татгалзаад байсан.
Тиймээс технологи, цахим ертөнцийн гигантууд болох Sony болон Google компаниуд хамтран онлайнаар киног гаргаж эхэлсэн. Зарим театрууд ч дэлгэцэндээ гаргаж үзэгчдэд толилуулсан билээ.
Харин АНУ-ын төр засгаас энэ кинотой холбоотой байр сууриа нэлээд олон удаа илэрхийлсэн. Жишээ нь АНУ-ын ерөнхийлөгч Барак Обама эхлээд зохисгүй зохиолтой кино байна хэмээн шүүмжилж байсан бол Sony компани хакердуулсны дараа байр сууриа эсрэг талд илэрхийлж эхэлсэн.
Мөн киног үзэгчдэд хүргэж эхэлснийг сайшааж урлагийн аливаа хэлбэрийг улс төртэй хольж ямарваа нэгэн халдлага, үймээн самуун дэгдээхийг санаархах нь байж болшгүй хэрэг хэмээсэн билээ.
Улмаар шинэ он гармагц Sony компанитай холбогдуулан АНУ, Умард Солонгосын харилцаа хурцадсанаар далимдуулж шинэ хориг арга хэмжээнүүд зарлагдах нь хэмээн албан бус эх сурвалжууд мэдээлж байсан нь ийнхүү батлагдаж байна.
Хориг арга хэмжээнд Умард Солонгосын Тагнуулын ерөнхий газар болон бусад тагнуул туршуултай холбоотой эрдэм шинжилгээний байгууллагууд, тус улсад төрөл бүрийн зэвсэг нийлүүлэгч байгууллага, зэвсэг нийлүүлэгч улсын тухайн асуудлыг эрхэлсэн байгууллагууд, уул уурхайн Komid корпораци, худалдааны Tangun trading корпораци, мөн батлан хамгаалахын судалгаа шинжилгээний байгууллагууд болон дээр дурдсан бүх байгууллагуудын дарга, удирдагч нарыг дурдсан байна.
Ийнхүү оны өмнө хоёр орны хурцадмал харилцааг улам хурцдуулсан "Ярилцлага" киноноос үүдэлтэй шуугиан он дамнан үргэлжилж, АНУ-ын Төрийн Департаментаас шинэ хориг арга хэмжээг авахад хүргээд байна.
Н.Төгс
