УИХ-ын эмэгтэй гишүүдийн бүлэг, Монгол дахь НҮБ-ын Хүүхдийн сан Монголын хүүхэд, эмэгтэйчүүдийн төлөө хамтран ажиллах боллоо
Уншсан 12067 vote 0 2013.03.07 15:46:52– Монголын хүүхэд, эмэгтэйчүүд, гэр бүлийн сайн сайхны төлөө гэсэн нэгдмэл зорилго, нийтлэг үзэл санаагаараа нэгдсэн Монгол дахь НҮБ-ын Хүүхдийн сан болон УИХ-ын эмэгтэй гишүүдийн бүлэг хамтран ажиллахаар болж, өнөөдөр Төрийн ордонд Харилцан ойлголцлын санамж бичигт гарын үсэг зурлаа.
Тус Санамж бичгийн хүрээнд хоёр тал сургуулийн өмнөх насны хүүхдийн боловсрол, хөгжил, эх, хүүхдийн эрүүл мэнд, хүүхэд хамгаалал, нийгмийн баримжаатай төсвийн бодлого, ухуулга нөлөөлөл зэрэг асуудлаар хамтран ажиллахаар тохиролцлоо.
УИХ-ын эмэгтэй гишүүдийн бүлэг дээр дурдсан асуудлаарх бодлого, хууль тогтоомж, хөтөлбөр, төсвийг батлах, тэдгээрийг үндэсний болон орон нутгийн түвшинд хэрэгжүүлэх, хяналт тавихад дэмжлэг үзүүлэх мөн иргэд, олон нийт, шийдвэр гаргагч, бодлого боловсруулагч нарт холбогдох асуулаар ухуулга нөлөөлөл хийх юм. Харин НҮБ-ын Хүүхдийн сангийн зүгээс эмэгтэйчүүд, хүүхдийн эрхийг хангах талаарх олон улсын тэргүүн туршлагуудыг нэвтрүүлэхэд дэмжлэг үзүүлнэ.
“УИХ-ын эмэгтэй гишүүдийн бүлгийн зүгээс биднийг ийнхүү дэмжиж байгаад бид маш их баяртай байгаа бөгөөд бидний хамтын ажиллагааны үр дүнд хүүхдийн асуудал бодлогын түвшинд улам чухал байр суурь эзэлж, улмаар хүүхэд, эмэгтэйчүүд, тэр дундаа хамгийн эмзэг бүлгийн хүүхэд, эмэгтэйчүүдэд үр өгөөжөө хүртээсэн олон чухал үр дүнд хүрнэ гэдэгт итгэлтэй байна” хэмээн Монгол дахь НҮБ-ын Хүүхдийн сангийн Суурин төлөөлөгч ноён Мохамед Фолл тус Санамж бичигт гарын үсэг зурах ёслолд зориулсан хэвлэлийн бага хурал дээр хэллээ. Тэрээр нэмж хэлэхдээ “энэхүү Санамж бичигт гарын үсэг зурснаар Мянганы хөгжлийн зорилтуудад хүрэхэд чиглэсэн монголчуудын хүчин чармайлтыг эрчимжүүлэх, мөн НҮБ-ын Хүүхдийн сангийн “Амлалт баталгаажуулах” санаачилгын хэрэгжүүлэхэд чухал ач холбогдолтой түншлэл болно гэж үзэж байна” гэлээ.
Ноён Мохамед Фолл НҮБ-ын Хүүхдийн сангийн нэрийн өмнөөс болон хувиасаа Монголын нийт охид, эмэгтэйчүүдэд олон улсын эмэгтэйчүүдийн эрхийг хамгаалах өдрийн мэнд хүргэж, НҮБ-ын Хүүхдийн сангийн зүгээс Монголын хүүхэд, гэр бүл, эмэгтэйчүүдийн сайн байхны төлөө бүхий л хүчин чармайлтаа дайчлан ажиллах болно гэдгээ илэрхийллээ. Санамж бичигт гарын үсэг зурах ёслолын үйл ажиллагаанд УИХ-ын эмэгтэй гишүүдийн бүлгийг төлөөлж М. Батчимэг, З.Баянсэлэнгэ, Р. Бурмаа, Ц.Оюунгэрэл, Д. Оюунхорол, Д. Сарангэрэл нар оролцлоо.