Бичлэгийн тоо 3,329
НИТХ-ын
ээлжит хуралдаан өчигдөр болж, Гэр хорооллын дахин төлөвлөлтийг
эхлүүлэх зарим байршлыг тогтоох асуудлыг хэлэлцэж, 100 хувийн
дэмжлэгтэйгээр баталлаа. Энэ хүрээнд нийт 12 төсөл хэрэгжүүлэх бөгөөд
42.6 мянган айл инженерийн шугам бүхий тохилог сууцанд орохын зэрэгцээ
агаарын бохирдол 30 хувиар буурч, 2000 оны хэмжээнд хүрэх боломжтой
болох нь.
Тодруулбал, Гэр хорооллын газрыг дахин зохион байгуулж, нөхцөл сайжруулах долоон төслийн хүрээнд 2920 нэгж талбай бүхий хашааны газарт дахин төлөвлөлт хийж, 4744 айлын амины тохилог орон сууцны хороолол бий болгох юм байна. Ингэснээр ердийн галлагаатай 4700 зуух үгүй болох нь. Харин Гэр хорооллын газарт дахин төлөвлөлт хийж, орон сууцжуулах төслөөр таван хороололд 37900 айлын орон сууц баригдсанаар хотын агаарын бохирдлын цөм хэсэгт байрлах нийт 7355 нэгж талбар буюу хашааны газрыг чөлөөлөх аж.
Эхний хэсэгчилсэн дахин төлөвлөлт хэрэгжиж эхэлснээр нийслэлийн байгаль орчны гамшигт байдал арилж, гэр хорооллын иргэд хүсэж, төсөөлж байсан шигээ сайхан орчинд амьдрах нөхцөл бүрдэнэ гэдгийг нийслэлийн Засаг дарга Э.Бат-Үүл онцолсон юм. Эхний ээлжинд 12 гэр хорооллын газарт дахин төлөвлөлт хийхэд нийт 179.8 тэрбум төгрөг шаардлагатай бөгөөд бүрэн дуусгахад зургаан жил зарцуулна хэмээн тооцоолж байна.