Тайландын Чиангмай хотын оршин суугч, 18 настай Апхирак /зохиомол нэр/ гэгч нутгийнхаа дуучин, загвар өмсөгч Пакорна Луматай адилхан болохын тулд гурван жилийн турш 16 удаагийн гоо сайхны хагалгаанд оржээ.

“Би зүгээр л хүмүүст таалагдахыг хүссэн. Надад хэн нэг нь үргэлж тийм ч царайлаг биш талаар дуулгаж байсан болохоор зүс царайгаа өөрчилснөөр хүмүүсийн надад хандах хандлагийг ч өөрчилж болно гэж бодсон” хэмээн тэрээр сэтгүүлчдэд ярьжээ. Ингээд Апхирак зорилгодоо хүрэхийн тулд комьютер засварлах, сайт хийх гэх мэтээр мөнгө цуглуулж эхэлсэн байна. Шаардлагатай мөнгийг цуглуулсны дараа тэрээр хамрыхаа хэлбэрийг засуулахаар гоо сайхны эмнэлэгт ханджээ.

Гэтэл мэс засалчид түүний авч ирсэн Лумагийн гэрэл зурагтай харьцуулаад Апхиракын хамрын ясны бүтэц, зөөлөн эд нь түүнийхээс огт өөр тул хүссэн үр дүндээ хүрч чадахгүйг хэлээд хийхээс татгалзжээ. Гэсэн ч Апхирак зүтгэсээр гоо сайхны хагалгаанд орсон ба шинэ хамрандаа сэтгэл хангалуун байгаа аж.

Дараа нь тэр эрүүний ясаа хусуулах, нүд томсгох, ботокс шахуулах, тусгай бэлдмэлийн тусламжтайгаар арьсны өнгийг цайруулах гэх мэт хагалгаануудыг хийлгэжээ. Сонирхолтой нь мэс засалчид түүний нас болон эцэг эхийнх нь зөвшөөрлийг огт сонирхоогүй гэнэ.

“Би мөнгөө төлөөд л тэд надад хэрэгтэй зүйлийг минь хийж өгч байсан. Шинэ царай минь надад их таалагдаж байгаа. Ганц дутагдал нь элдэв гадны зүйл, гэмтлээс хамгаалах шаардлагатай болсон” хэмээн тэрээр ярьжээ. Статистикээс харвал Тайландад насанд хүрээгүй хүмүүсийн дунд гоо сайхны хагалгаа хүчээ авч байгаа аж.