од бүсгүйн үхэл Английг цочирдуулж байна
Их Британийн Кент гүнлэгийн оршин суугчдаас өгсөн дуудлагын дагуу өчигдөр 13.35 цагийн үед цагдаа нар нэгэн айлд очжээ. Тэр нь Их Британийн шоу бизнесийн алдартай хөтлөгч, сэтгүүлч, загвар өмсөгч бүсгүй Пичес Гелдофынх бөгөөд гэрийн эзэгтэй учир битүүлгээр амьсгаа хураасан байжээ.
Өнөөдөр англичууд залуу хатагтайн үхлийн талаар бүгд шуугиж байна. Гелдоф сарын өмнөхөн 25 насныхаа төрсөн өдрийг тэмдэглэсэн бөгөөд зүүн өмнөд Лондонгийн S.C.U.M хамтлагийн дуучин хөгжимчин Томас Кохентой гэрлэж хоёр хүүхэд төрүүлсэн юм.
Английн алдартай зохиолч, хөтлөгч телевизийн од Паула Уэтесийн охины хувьд бүсгүйн хувийн амьдрал эртнээс л англичуудын сонирхлыг ихэд татдаг байжээ. Тэр бүр коллежид байхаасаа л The Guardian, The Daily Telegraph зэрэг алдартай хэвлэлүүдэд нийтлэл тойм бичиж байв.
Ээжийгээ даган сэтгүүлзүйд хөл тавьсан Гелдоф загварын ертөнцөд ч цахиур хагалаад амжсан ба сүүлийн үед нийгмийн цахим сүлжээ твиттерийн од болж хувирсан юм. Тэрээр 255 мянган дагагчтай ба түүний бяцхан хүү Асталаг твиттер хуудас дахь Их Британийн хамгийн алдартай жаал хэмээн нэрлэх болжээ.
Английн хөлбөмбөгч Дэвид Бэкхем, “Spice girls”-ын экс гишүүн Виктория нарын охин Харпер Севен бол Их Британийн хатан хаанаас ч илүү алдартай хэдий ч Асталаг аав ээж нь төрснөөс хойш бараг өдөр болгон шахам зургийг нь твиттер хуудсандаа тавьдаг байснаас жиргээчдийн ертөнцөд хамгийн олон хүн мэддэг, алдартай хүүхэд болсон гэнэ.
Гэх мэтээр Гелдоф болон түүний гэр бүл англичуудын сонирхлыг ихэд татсаар ирсэн. Гелдофын ээж дээр дурдсан Паула Уэтес 2000 онд охиноо 11 настай байхад нь нас барсан бөгөөд Лондон дахь гэрээсээ мансууруулах бодис хэтрүүлэн хэрэглэсэний улмаас амьсгаа хураасан байдалтай олдсон юм. Тэгвэл 14 жилийн дараа охин нь мөн л ээжийнхээ нэгэн адилаар гэртээ нас барсан байдалтай олдлоо.
Британийн шар хэвлэлүүд 25 настай бүсгүйн учир битүүлэг үхлийг түүний амьдарч байсан байшинтай холбон бичиж эхэлжээ. Бүсгүй өдгөөгөөс жилийн өмнө твиттерээр нэгэн сенсаци тарьж байжээ. Маш их аз жаргал баяр баясгалантай байсан Гелдоф айж цочирдсон байдалтай ийн бичжээ.
Юу гэвэл Гелдофын хүүхэдтэйгээ авахуулан Instagram-д оруулсан зураг дээр өөрийнх нь мөрөн дээгүүр өөр хэн нэгний гар тавиатай байгаа нь тодоос тод гарчээ.
“Би Асталатайгаа усны өрөөнд байхдаа гар утасаараа зургаа авхуулаад маш их гайхлаа. Би нэг гараараа охиноо тэвэрч, нөгөө гараараа аппаратаа барьж байсан болохоор энэ яавч миний гар биш” гэж бичжээ. Ганц энэ зураг ч биш бас өрөөний нь нээлттэй хаалгаар сонин гэрэл орж ирж байсан нь Гелдофыг бүр айлгаж орхисон тухай тэр жиргэжээ.
Тэгээд байшингийнхаа үүх түүхийг судлаад үзвэл энэ байшинг 1920-иод онд нэгэн баян эр, түүний жирэмсэн эхнэр хоёр бариулсан ба Гелдофын үгээр бол тэр эхнэр нь үхсэн хүүхэд төрүүлэн ухаан солиорсон түүхтэй гэнэ.
Ийм хачин сонин зүйлээр цахим ертөнцөд жилийн өмнө шуугиан тарьж байсныг одоогийн бүсгүйн үхэлтэй холбон тайлбарлагсад шар хэвлэлүүдээр олширчээ.
Үнэн худлыг мэдэхгүй Британийн шоу бизнесийн од бүсгүйчүүдийн үхэлтэй холбоотой хачин жигтэй зүйлс бишгүй. Ямартай ч залуухан бүсгүй учир битүүлгээр нас барж англичуудыг эмгэнүүлж, бас гайхашруулж байна.
Н.Төгс