Хакүхо энэ башёд түрүүлснээр 25 дахь удаагаа Эзэн хааны цомыг гардан авлаа. Одоо түүнд их аварга Чиёоноүмигийн 31, Тайхогийн 32 түрүүг гүйцэх зорилт шинээр гарч ирж байна.

Мэргэжлийн сүмогийн Зуны тэмцээн сүүлийн үед гараагүй өрсөлдөөнтэй, сонирхолтой болж өнгөрлөө. Тэмцээний 14 дэх өдөр нэг ч унаагүй тэргүүлж явсан их аварга Хакүхо, озэки Кисэносато нар хоорондоо таарч барилдсан. Кисэносатод хэдийгээр барьц алдсан ч ялсан Хакүхо барилдааны дараа “Үзүүр түрүүний барилдаан шиг л сайхан барилдаан боллоо. Ийм муу барьцтай байж Кисэносатог ялна гэдэг би ямар ч гэсэн нэг, хоёр дахин илүү байна гэсэн үг. Гэхдээ Кисэносато сайжирсан байна” гэж өрсөлдөгчөө магтаад ёкозүна болоход хамгийн ойр байгаа бөх бол Кисэносато гэж цухуйлгаад авсан.

Харин ялагдсан арсланг хувцас солих өрөөнд нэгэн сайн мэдээ угтсан нь Сүмогийн холбооны тэргүүн Китаноүмигийн үг байлаа. Китаноүми “Холбооны дүрэм ёсоор хоёр тэмцээн дараалан түрүүлсэн юм уу, үзүүрлэсэн бөхөд ёкозүна цол өгдөг. Тиймээс Кисэносато энэ тэмцээнд түрүүлж чадахгүй байлаа ч 14 ялаад ирэх тэмцээнд сайн барилдвал ёкозүна болгох талаар ярих болно” гэж мэдэгдсэн юм. Харин энэ үг Кисэносатод дарамт болсон бололтой сүүлийн өдөр озэки Котошёогикүд маш амархан түлхүүлэн ялагдсан. Ингэснээр ёкозүна Хакүхо түрүүлэх нь тодорхой болж, 25 дахь удаагаа Эзэн хааны цомыг гардан авлаа.

Харин Сүмогийн холбооны тэргүүн Китаноүми Кисэносатогийн 13 ялалтыг үзүүрлэсэн амжилт гэж үзэж болно, гэхдээ ирэх Нагоягийн тэмцээнд маш сайн барилдан, түрүүлж байж л ёкозүна болно доо гэж хэлсэн нь түүнд найдвар бага ч гэсэн үлдсэнийг харууллаа. Хоёр жил завсарласны эцэст Токиод түрүүлсэн Хакүхогийн хувьд Асашёорюүгийн 25 түрүүтэй зэрэгцлээ. 10 удаа ганц ч уналгүй түрүүлсэн нь сүмогийн түүхэнд нэгт бичигдэж байна. Одоо түүнд их аварга Чиёонофүжигийн 31, Тайхогийн 32 түрүүг гүйцэх зорилт шинээр гарч ирж байна.

Энэ тэмцээнд барилдсан хоёр сэкивакэ, хоёр комүсүби болон маэгаширагийн 4 хүртэлх бөхчүүдээс маэгаширагийн нэгт бичигдсэн Миёогирюүгээс бусад нь тавин хувийн амжилт үзүүлж чадаагүй тул ирэх тэмцээний банцүкэ хэрхэн гарах нь ихээхэн сонирхол татаж байна. Зуны тэмцээний уран барилдааны шагналыг 1 аварга, 2 озэкиг унагаасан Миёогирюү хүртэж, дайчин барилдаан, гарамгай барилдааны шагналыг авах бөх гарсангүй.

Болгар арслан Котоошюү тэмцээний сүүлийн өдөр озэки Какүрюүгээр найм дахь ялалтаа аван, озэки цолоо хадгалан үлдэж чадлаа. Жюүрёод Садогатакэ дэвжээний Котоюүки (13-2), макүшитад Отакэ дэвжээний египет бөх Осүнаараши (7-0), санданмэд Ойтэказэ дэвжээний Дайэйшёо (7-0), жониданд Миягино дэвжээний Ишимүра (7-0), жонокүчид Сакайгава дэвжээний Шинэйяма (7-0) нар тэргүүллээ. Долдугаар сарын тэмцээнд манай Тамаваши дээд зиндаанд эргэн орох нь тодорхой болсон. Харин зүүний хоёроос барилдсан Таканоива макүүчид гарах эсэх нь дээрээс хэдэн бөх унах эсэхээс шалтгаалах болоод байгаа. Учир нь ирэх тэмцээнд Өвөрмонголын Соококүрай макүүчигийн 15-д бичигдэхээр болоод байгаа билээ.

Макүшитад түрүүлсэн Осүнаараши ирэх Нагоя башёд жюүрёод дэвших нь гарцаагүй болсон. Тэрбээр макүшитагийн 7-д байгаа ч Сүмогийн холбооны дүрэмд макүшитагийн эхний 15-д бичигдсэн бөх 7 ялахад жюүрёод дэвшинэ гэж заасан байгаа тул Африкийн анхны цолтой бөх болох нь мадаггүй. Осүнаараши жюүрёогийн 13 дахь бөх Акисэямаг ялж, зиндаандаа түрүүлсэн билээ. Мөн зүүний нэгээс босч барилдсан Сэйро А.Өнөболд тав ялсан тул жюүрёод гарах болсон. Харин макүшитагийн зүүний гурваас босч барилдсан өнгөрсөн жилийн сонирхогчдын сүмогийн ёкозүна, Хаятэказэ дэвжээний Эндо тав ялснаар бас зиндаа ахиж магадгүй болоод байна.

Зүүн                                                   Баруун
Хакүхо 15-0              Ёкозүна               Харүмафүжи 11-4
Кисэносато 13-2       Озэки                  Какүрюү 10-5
Котошёогикү 11-4     Озэки                  Котоошюү 8-7
Гоэйдо 7-8               Сэкивакэ             Барүто 3-5-7 гэмтэл
Точиоозан 6-9           Комүсүби           Окиноүми 4-11
Миёогирюү 11-4        Маэгашира1      Аминишики 6-9
Китатайки 4-11            2                     Точиношин 2-13
Такарафүжи 6-9          3                     Аран 4-11
Аойяма 5-10               4                     Тоёоношима 7-8
Шёохозан 8-7              5                     Такаясү 8-7
Ёшиказэ 7-8               6                      Такэкэзэ 9-6
Фүжиазүма 8-7           7                     Жёокорюү 4-11
Токитэнкү 10-5            8                     Саданофүжи 7-8
Кёкүтэнхо 9-6             9                      Икиой 9-6
Чиёотайрюү 10-5        10                    Тоёохибики 8-7
Шёотэнро 5-10            11                   Гагамарү 11-4
Ваканосато 6-9           12                    Кёкүшюүхо 5-5-5 гэмтэл
Дайдо 8-7                   13                   Масүнояма 7-8
Кайсэй 8-7                  14                   Чиёоотори 6-9
Чиёонокүни 9-6           15                     Хомарэфүжи 5-10
Азүмарюү 6-9             16                     Дайкихо 3-12

МОНГОЛЫН БӨХЧҮҮД

Жюүрёо

Зүүн-1 Тамаваши Б.Мөнх-Оргил 11-4
З-2 Таканоива А.Баасандорж 8-7
З-4 Асасэкирюү Б.Дашням 5-10
Б-9 Ониараши Ө.Өлзийжаргал 7-8
Б-13 Кагамио Б.Нанжид 12-3

Макүшита

З-1 Сэйро А.Өнөболд 5-2
З-2 Сакигакэ Я.Баттүшиг 3-4
Б-4 Араваши Э.Дөлгөөн 3-4
Б-6 Сэншёо Э.Баярбат 3-4
Б-10 Вакамишёо Г.Ган-Эрдэнэ 6-1
Б-12 Рюүонами Б.Буянжаргал 3-4
З-32 Чиёошима Г.Мөнхсайхан 4-3
Б-34 Широнорюү Э.Одгэрэл 4-3
З-43 Тайка С.Шаравнямбуу 6-1
Б-57 Тоорүгава Д.Ууганбаатар 4-3

Санданмэ

З-2 Рюүо Э.Санчирболд 3-4
Б-11 Аратоши В.Цэрэндорж 3-4
Б-28 Дайонами Б.Ууганбаяр 4-3
З-50 Такакасүга Э.Энхманлай 4-3

Жонокүчи

Б-5 Дайшёохо Ч.Шижирбаяр 6-1