Японы Саппоро хотын мэргэжлийн хөлбөмбөгчин Ито Дан Монголын лигт хүч үзэх болсноо мэдэгдлээ. Манай хөлбөмбөгийн лигт Японы тоглогч хэд хэд байсан ч Ито Дан шиг хөлбөмбөгч ирж байгаагүй юм. Учир нь Монгол түүний хувьд лигт нь хүч үзсэн 16 дахь орон болох гэнэ. 16 орны мэргэжлийн лигт тоглож үзсэн хөлбөмбөгч дэлхийд бараг байхгүй гэх бөгөөд Ито Дан хэвлэлийн хурал дээр “Монголд амжилттай сайхан тоглоод дараа нь Гиннесийн номонд бүртгүүлэх бодолтой байгаа. Манай Японд элгэмсэг дотно ханддаг энэ оронд хөлбөмбөг тоглох сон гэж эртнээс бодож явсан” гэж ярьсан байна.
Ито Дан энэ 2001 оноос эхлэн Азийн орнуудад тоглож эхэлжээ. Энэ жилийн хоёрдугаар сараас Филиппинд тоглож, гэрээгээ сунгах санал хүлээж авсан ч Монголыг сонгосон байна. Монголын аварга “Эрчим” багт намтар, тоглолтын бичлэгээ явуултал түүний ур чадвар, гадаадын лигт олон жил тоглосон туршлага үнэлэгдэн гэрээ байгуулахаар болжээ. Ито Дан удахгүй Монголд ирж, ирэх сарын 1-эд эхлэх Нийслэл лигийн тэмцээнд оролцоно. “Эхний тоглолтдоо гоол хиймээр байна” гэж ярих 37 настай Ито Даны Монгол дахь аялал эхлэх гэж байна.
Нэр: Ито Дан
Төрсөн огноо: 1975 оны 11 сарын 3
Төрсөн газар: Япон Хоккайдо Саппоро
Өндөр: 1.73 м
Байрлал: Довтлох чиглэлийн хагас хамгаалагч
Тоглосон багууд
Он Баг Улс
1998–1999 Бруммел Сэндай Япон
2000 Саппоро Шюүкүдан Япон
2001 Вүдлэндс Велингттон Сингапур
2002 Уэст Гэйт Австрали
2003 Сайгон Порт Вьетнам
2004 Кичэ Хонконг
2004 Саба Тайланд
2004 Кичэ Хонконг
2005 Пенанг Малайз
2005–2006 КАФ Бруней
2006 Валенси Мальдив
2006 КАФ Бруней
2006 ДПММ Малайз
2007–2008 КАФ Бруней
2008 Туэн Мүн Прогоал Хонконг
2009 Виндсор Арч Ка Макао
2009-2011 Чурчилл Бротэрс Энэтхэг
2011 Ракапүра Юнайтэд Мьянмар
2011-2012 Мананг Балба
2012-2013 Бүйлд Брайт Юнайтэд Камбож
2013- Грин Арчерс Юнайтэд Филиппин
2013- Эрчим Монгол