Ийм л эр хүн байгаач...

Үнэн гэвэл би чамд үнэхээр их хайртай. Чамаас өөр эр намайг ийм аз жаргалтай байлгаж чадахгүй гэж боддог. Өөр сайхан эрийн нүд намайг цоо ширтэж байсан ч би огтхон ч анзааралгүй ганцхан чамайгаа чиглээд алхаж чадна. Гэр бүл минь эсэргүүцэж байсан ч би хэзээ ч надаас гарахгүй тийм их эр зоригоор ганцхан чамайг л дагаж чадсан.

Би эргэж хараагүй бас ухраагүй. Өдөр хоногийг өнгөрөөх гэж хамтдаа тэмцэх үед өөрөөсөө шаардагдах бүхий л боломжоо би шавхаж ирлээ. Би чамайгаа зовоохгүй гэж, ядраахгүй гэж бас гомдоохгүй гэж эмэгтэй хүний бардам зангаа хойш нь тавиад, дааж барамгүй амьдралын хүнд ачааг шүд зуун үүрч явна.Гэхдээ өдөр хоног өнгөрөх бүр би өөрийнхөө дотор хүнтэй тэрсэлдсээр хүчээ барж, яах хэрэгтэйгээ ч мэдэхээ байлаа.

Яагаад миний эр хүн надаас хүчгүй сул дорой юм бол?

Яагаад миний сонгосон эр хүн амьдралаа авч явах ноён нуруугүй юм бол?

Чамайгаа харах бүрт өөрийн эрхгүй урам хугарч, өөр хэн нэгэн байсан бол илүү сайхан амьдрах байсан даа гэсэн дэндүү тэнэг, өрөвдөлтэй бодол миний толгойд орж ирээд байх юм.Магадгүй би урт үстэй ухаан богинотой нэгэн байж болох.

Гэхдээ чи миний энэ ухаанаас илүү урт холын ухаан тээж яваа бол наддаа нуулгүй хэлээч! Чамайгаа буруутгах гэсэндээ үүнийг бичиж суугаа хэрэг биш шүү. Зүгээр л, чамайгаа юу бодож явааг ойлгож чадахгүй байна.

Өдөр ирэх тусам л бид ойлголцохоо байж, нэг нэгнийхээ өөдөөс хаалга савахаас өөр зүйл хийж чадахаа байлаа. Магадгүй чамаас би хэтэрхий их зүйл шаарддаг байх. Гэхдээ би хамтдаа ажиллаж, хооллож, инээлдэж, тэмцэж, тэмүүлж амьдрахыг л хүссэн. Тэгээд ч би өглөө, орой, өдөр, шөнө, өнөөдөр маргааш ч уйлж шаналж, залхаж, ядарч гав ганцаараа мэт амьдрахыг хүсэхгүй байна.

Би таныг хүнд хэцүү үед нурууг минь илж тайвшруулаад, хамтдаа сөрж чадах хүч чадалтай эр хүн байгаасай л гэж бодсон юм. Энгэрт нь асгарч эхэр татан уйлахад нулимсыг минь арчаад, зүрхийг минь дулаацтал тэвэрч өгөөсэй л гэж хүсдэг юм. Би хүч муутай бас бодол богинотой бүсгүй хүн байж болох ч чи минь уулыг нурааж усыг эргүүлж чадах эр хүн учраас хэн бүхнээс хэд дахин илүү байгаасай л гэж би боддог. Хийж бүтээхдээ хэний ч ард суудаггүй, хэлж зөвлөхдөө хүний ухааны урд нь байдаг, үр хүүхэддээ үлгэр дуурайлал болох эр зоригт баатар мэт төсөөлөгддөг эцэг хүн байгаасай л гэж итгэж хүлээдэг юм. Чамайгаа зовлон дунд чулуу шиг хатуу байж даваад гардаг, жаргал дунд инээд хөөртэй сэтгэл дүүрэн алхалж чаддаг, өөрийгөө хэзээ ч хэний ч дор орохгүй хүчтэй нэгэн гэдэгт итгээсэй л гэж хүсдэг юм. Өөр олон юм би хүсэхгүй. Би бол жижигхэн зүйлсийг хэтэрхий том ажил болгодог бүсгүй хүн байх. Харин та энэ жижигхэн амьдралыг дэлхий шиг том болгох эр хүн нь шүү дээ.

- Би таныг салхинд одчихдог үүл шиг нэгэн биш манан дунд ч цасан шуурганд ч сүндэрлэж л байдаг уул байгаасай л гэж бодно.

- Би таныг хүйтэнд өндөгөө орхиод нисдэг жигүүртэн бус үүрээ хамт засалцаж, үрээ манаж хамгаалдаг бүргэдийн дайтай нэгэн байгаасай л гэж бодно.

- Би таныг бусдын хүсэлд дарлагддаг бирд төдийхөн биш өөрийн бодлоор өрөөлийн мунхаглалд цэг тавьдаг эзэн шиг, эцэг шиг нэгэн байгаасай л гэж бодно.

Би чинь чамаасаа ийм зүйлийг л тэсч ядан хүлээдэг. Өдөр бүр өөрийгөө хүчлэн байж маргааш тэр минь өөрчлөгдөх болно гэж итгүүлдэг. Уг нь чамайгаа төгс бай гэж би хэлсэнгүй. Угаас эм хүн болж төрсөн учраас дэргэд минь эр хүн шиг байгаач л гэж гуйсан юм.

Чи минь өөрөө даарсан ч бээрсэн гараараа хурууг минь атгаад, хамтдаа дулаацаж чаддаг халуун зүрхтэй байгаасай.

Чи минь өөрөө ядарсан ч эвэршсэн хурууг минь хайрлаж үнсээд хамтдаа оройн хоолоо хийж, халуун дээр нь цугтаа иддэг байгаасай.

Чи минь өөрөө залхсан ч цөхөрсөн нүдрүү минь цоо ширтээд, “хамтдаа тэмцээд гарна аа” гэж чанга хэлээд, тэвэрдэг байгаасай.

Чи минь өөрөө залхуурсан ч ядарсан намайгаа ойлгоод, хамтдаа сууж амрангаа дахин шинээр хийж эхлэхэд хэзээд бэлхэн байдаг цуцашгүй нэгэн байгаасай.

Ийм л эр хүн байгаасай. Энэ гайхалтай эр хүнийг дуурайсан эрэлхэг бяцхан үр минь хорвоод мэндэлбэл ямар их аз жаргал вэ? Учир нь жинхэнэ эр хүн шиг эцэг хүний дэргэд л бидний бяцхан үр хүмүүжиж “Би том болоод аав шигээ болно” гэж хүн болгонд сайрхаж чадна.