Олны танил хүмүүстэй спортын сэдвээр хөөрөлддөг булангийнхаа энэ удаагийн зочноор дуучин Д.Оюунтүлхүүрийг урьсан юм.

-Та багадаа спортоор хичээллэдэг байсан уу?

-Хэдийгээр би багаасаа урлагаар явсан ч гэсэн усанд сэлэлтээр хичээллэдэг байлаа. Дуучин хүнд хөгжүүлэх шаардлагатай булчин гэж байдаг. Түүнийгээ хөгжүүлэхийн тулд гэртээ дасгал хөдөлгөөн их хийнэ. Урлагийн хүн гэмтэх нь амархан болохоор спортоор гүнзгий хичээллэж байгаагүй.

-Японд олон жил амьдарсны хувьд урлаг, спортын ододтой нь цөөнгүй уулзаж явсан байлгүй?

-Спорт, урлаг хоёр өөр боловч зарим нэгэн арга хэмжээний үеэр спортын од тамирчидтай уулзах завшаан тохиодог байлаа. Мэдээж Монголынхоо сүмочидтой байнга уулзалдана. Мөн Японы алдартай бейсболын тамирчдаас нэг бус хүн танина шүү. Нэг удаа Осакад бөхийн спортын томоохон фестивалийн үеэр NHК телевизээс концерт зохион байгуулсан юм. Тэр арга хэмжээнд ая дуугаа өргөснөөрөө их бахархдаг шүү.

-Японы домог болсон тамирчин, олимпийн хошой, дэлхийн зургаан удаагийн аварга Мияки Ёшинобү гуай Монголд айчлах үеэр тантай уулзсан болохоор энэ хүнтэй хэр зэрэг танил болохыг тань асуухгүй өнгөрч чадахгүй нь?

-Хүндийг өргөлтийн нэртэй тамирчин асан Мияки Ёшинобү бол улсдаа жинхэнэ бахархал болсон тамирчдын нэг. Түүний амжилтыг давтсан тамирчин Японоос өнөө хэр гараагүй байна. Миний бие Монгол-Японы соёлын харилцааны нийгэмлэгийн ерөнхийлөгчөөр ажилладагийн хувьд спортын салбарт өндөр амжилт гаргасан нөлөө бүхий эрхэм ирсэнд баяртай байна. Ерөнхийдөө энэ хүнийг манай нийгэмлэгийн чиглэлээр ирсэн гэж ойлгож болно.

-Спортын сэдэвтэй уран бүтээл хийх бодол байдаг уу?

-Хэдийгээр харахад өөр ч гэсэн миний бодлоор спорт, урлагийн зорилго, чиглэл нь ижил байдаг юм шиг ээ. Хоёулаа л адилхан олон улсын харилцаанд хил зааг байхгүй болгох үүрэгтэй. Тамирчны нэгэн адил дуучин хүнд ур чадвар, авьяас, хөдөлмөр бүгд шаардлагатай. Тийм учраас тамирчдадаа зориулсан бүтээл гаргах төлөвлөгөө бий.

-Зурагтаар спортын ямар төрлийг сонирхон үздэг вэ?

-Олимпийн наадмыг бол тэр энэ тэр гэж ялгахгүй бүгдийг нь сонирхон үздэг.

-Ирээдүйд үзэхээр төлөвлөсөн тэмцээн уралдаан бий юу?

-Уг нь Лондоны олимпийг үзэхийг маш их хүсч байсан. Гэвч ажлын зав зайнаас шалтгаалаад явж чадаагүй. Харин эртнээс төлөвлөж байгаад Рио-де-Жанейрогийн олимпийг очиж үзнэ дээ. Мөн Токио хот 2020 оны олимпийг зохион байгуулах эрхийн төлөө өрсөлдөж байгаа. Энэ удаа ялах боломжтой. Хэрвээ олимпийн эрхийг авчихвал Токиогийн олимпийг заавал үзнэ.

-Наадмаар Төв цэнгэлдэхэд өнждөг үү, эсвэл Хүй долоон худгийг зүглэдэг үү?

-Ихэвчлэн морин дээр очдог юм. Бөхийг бол зурагтаараа үзчихдэг.

-Хүндэлж биширч явдаг тамирчид гэвэл хэнийг нэрлэх вэ?

-Мэдээж хэрэг олимпийн аваргуудаа нэрлэнэ. Мөн МонголЯпон хоёр орныг холбож өгсөн гүүр нь болсон сүмочдоо хүндлэхгүй байхын аргагүй.

-Танд баярлалаа.