Хууль зүйн яамны Төрийн нарийн бичгийн дарга Ж.Баярцэцэг НҮБ-ын Мансууруулах бодис, гэмт хэрэгтэй тэмцэх албаны Гүйцэтгэх захирал Ю.Федетовтай өнөөдөр уулзав.  Уулзалтын үеэр Төрийн нарийн бичгийн дарга Ж.Баярцэцэг Монгол Улсын Засгийн газраас санаачлан хэрэгжүүлж байгаа шүүхийн шинэчлэл, авлига болон зохион байгуулалттай гэмт хэрэгтэй тэмцэх зэрэг асуудлын хүрээнд авч хэрэгжүүлж байгаа арга хэмжээний талаар танилцуулж, энэхүү асуудлаар хамтран ажиллах сонирхолтой байгаагаа илэрхийлсэн байна.

Мөн техникийн туслалцаа үзүүлэх болон мэргэжлийн шинжээчдийг Монголд ажиллуулахад дэмжлэг үзүүлэхийг хүсэлт болгов.      

Гүйцэтгэх захирал Ю.Федетов “Хүний наймаатай тэмцэх асуудлаарх өндөр хэмжээний уулзалт"-д Монгол Улсын Засгийн газар ач холбогдол өгч, өндөр түвшинд оролцож байгаад талархал илэрхийлээд, Төрийн нарийн бичгийн даргын дэвшүүлсэн санал, санаачилгыг дэмжиж ажиллахаа илэрхийлэв. Авлигатай тэмцэх болон зохион байгуулалттай гэмт хэрэгтэй тэмцэх асуудлаар Монгол Улсын Засгийн газраас дэвшүүлж байгаа санал санаачилга бодит амжилтад хүрч байгаад баяр хүргээд, шинээр байгуулагдаж байгаа зохион байгуулалттай гэмт хэрэгтэй тэмцэх мөрдөх албыг бэхжүүлэх, боловсон хүчний чадавхийг нэмэгдүүлэхэд анхаарч, холбогдох дэмжлэг үзүүлж ажиллахаа мэдэгдлээ.