Ерөнхийлөгч гурван сая дахь иргэнд Х.Монголжин гэж нэр хайрлажээ
Уншсан 2023 vote 0 2015.01.28 17:47:19Өнөөдрийн хамгийн сайхан мэдээ Монголын гурван сая дахь иргэн мэндэлсэн тухай мэдээлэл байлаа. Улс даяар хүлээлт үүсгээд байсан Монголын гурван сая дахь иргэн энэ сарын 24-ний өглөө Өмнөговь аймгийн Даланзадгад сумын Нэгдсэн эмнэлэгт Э.Хатанболд, Г.Аззаяа нарын ууган охин болон мэндэлжээ. Энэ тухай Монгол Улсын Ерөнхийлөгч Ц.Элбэгдорж өнөөдөр морин цагт буюу 11.40 цагт ард түмэнд айлтгалаа. Гурван сая дахь иргэн 181 үе чацуутнаа дагуулан мэндэлсэн байна. Тэдний дунд нийслэлийн Сүхбаатар дүүрэг, АНУ-д тус бүр ихэр хүүхэд төржээ. Монголчууд улам олуулаа болохыг бэлгэдэн гурван сая дахь иргэн мэндэлснийг тохиолдуулж Монгол Улсын Ерөнхийлөгч үг хэллээ. Тэрбээр “Дүн өвлийн цас бударсан сайхан өглөө, өвлийн адаг сарын шинийн есний балжиннямтай хөх луу өдөр монголчууд 3 саяулаа болсныг айлтгаж байгаадаа бэлгэшээж байна” гэв.
Гурван сая дахь иргэний үе чацуутнаас 3 нь хилийн чинадад мэндэлжээ
Гурван сая дахь иргэн 3.5 кг жинтэй, 50 см урттай охин юм. Энэхүү төрөлт нь тухайн гэр бүлийн анхны төрөлт байсан нь ихэд бэлгэшээж байгаа аж. Гурван сая дахь иргэний үе чацуутан болон мэндэлсэн 181 хүүхдийн гурав нь хилийн чинадад мэндэлснээс ихэр хүүхэд байжээ. Өнөөдөр үдээс хойш Засгийн газрын ээлжит бус хуралдаан болно. Хуралдаанаар гурван сая дахь иргэн болон үе чацуутнуудтай холбоотой асуудлуудыг хэлэлцэхээр болжээ.
Гурван сая дахь иргэнд 70 сая төгрөг олгох эрхийг нь олгожээ
Хүн амын хөгжил, нийгмийн хамгааллын сайд С.Эрдэнэ гурван сая дахь иргэнийг алдаршуулж, урамшуулахад Монгол Улсын Засгийн газраас 958 сая төгрөг төсөвлөсөн гэдгийг дуулгалаа. Гурван сая дахь иргэн болон хүүхдэд 70 сая, үе чацуутнуудад 3 сая төгрөг олгохоо Засгийн газраас мэдэгдсэн. Тэгвэл энэ сарын 24-нд төрсөн гурван сая дахь иргэндээ 70 сая төгрөг олгох эрхийг нь аймгийн ИТХ-аас нь олгожээ. Мөн хамгийн ойр төрсөн эхний 30 хүүхдэд 3 сая төгрөг олгох эрхийн бичгийг аймаг, дүүргийн ИТХ-аас олгоод байгаа аж.
Гурван сая дахь иргэнийг Х.Монголжин гэж нэрлэжээ
Гурван сая дахь иргэнийг төрүүлсэн ээж, гурван сая дахь иргэн болон мэндэлсэн охины бие сайн байгаа гэж байна. Ээж, охин хоёр энэ сарын 26-нд эмнэлгээс гарчээ. Монголын гурван сая дахь иргэнийг Х.Сэлэнгэ гэж нэрлэсэн байна. Нэрээ будаан дотроос сугалсан тухай охины ээж хуучилсан байна. Тэгвэл Монгол Улсын Ерөнхийлөгч Ц.Элбэгдорж дөнгөж сая гурван сая дахь иргэнийг Монголжин гэж нэрлэлээ. Ийнхүү гурван сая дахь иргэний нэрийг өөрчилсөн байна. Охины аав, ээжийн хувьд 1992 онд төрсөн юм байна.
Монгол Улсын иргэд 1962 онд нэг сая, 1988 онд 2 сая болсон бол ийнхүү 2015 оны нэгдүгээр сард 3 саяулаа боллоо.