Хөдөлмөрийн яамнаас хэрэгжүүлж буй Хөгжлийн бэрхшээлтэй иргэдийн хөдөлмөр эрхлэлтийг дэмжих төслийн хүрээнд Тэргэнцэртэй иргэдийн үндэсний холбооныхон Тэргэнцэр засвар үйлчилгээний төв байгуулжээ. Хан-Уул дүүргийн Хөдөлмөр эрхлэлт үйлчилгээний төвийн баруун тал буюу хуучнаар Гутлын үйлдвэрийн хашаанд байрлах тус төвийг танилцуулах үйл ажиллагааны нээлт өчигдөр боллоо.

Нээлтэд холбооны гишүүд, Хүн амын хөгжил, нийгмийн хамгааллын яамны Төрийн нарийн бичгийн дарга, ДЭМБ-ын зөвлөх нарын албаны хүмүүс оролцов. Манай улсад албан бус тоогоор тэргэнцэртэй 10 мянга орчим иргэн байдаг ч тэргэнцэр засахаас үйлдвэр, засаж сэлбэх үйлчилгээ эрхэлдэг албан ёсны газар, байгууллага байдаггүй байжээ.

Монголдоо анхдагч тус төв тэргэнцэр засахаас гадна сэлбэг хэрэгсэл худалдан борлуулж, тэргэнцрийг хэрхэн жолоодох талаар сургалт зохион байгуулах гэнэ. Хоёр засварчин, нэг оёдолчин, нэг менежертэй үйл ажиллагаагаа эхлүүлж байгаа тус засварын газар өдөрт арав гаруй тэргэнцэр засварлах хүчин чадалтай бөг өөд үйлчилгээний тариф нь 500-3000 төгрөг байх ажээ. Хөгжлийн бэрхшээлтэй хүмүүсийн нийгмийн харилцаанд оролцоход хамгийн гол үүрэгтэй, амьдралын зайлшгүй хэрэгцээ бол тэргэнцэр. Тиймээс ч эвдэрч, гэмтэх, тэр дундаа дугуй нь элэгдэх, хий нь гарахаас эхлээд тэдэнд бэрхшээл мундахгүй их тулгардаг байна. Өөрсдөө гэрээрээ янзалдаг ч засвар авахгүй байх тохиолдол ч нэлээд гардаг гэнэ.

Тэргэнцэртэй иргэдийн үндэсний холбооны тэргүүн Б.Чулуундолгор “Бид ашиг харж энэ төвийг нээгээгүй. Монголд байх ёстой үйлчилгээ учир хүч хөдөлмөр, сэтгэл оюунаа шингээж ийм төвтэй боллоо. Мөн холбооныхоо хэрэгцээнд зориулж хөгжлийн бэрхшээлтэй иргэдийг зөөвөрлөдөг өргөгддөг шат буюу лифттэй автобусыг оруулж ирж байгаа” гэв. Манай улсын тэргэнцэртэй иргэдийн дийлэнх нь олон улсын байгууллагын хандив тусламжаар ирсэн эмнэлгийн зориулалттай тэргэнцэр ашигладаг юм байна. Цаашдаа тус төв нь гаднаас хөгжлийн бэрхшээлтэй тухайн иргэний онцлогт тохирсон тэргэнцэр оруулж ирэх бодолтой байгаа гэлээ.