-Та гурван удаа “Дэлхийн шилдэг хөлбөмбөгчин” болж, маш олон шагналын эзэн болсон. Таны жилийн цалин 50 сая ам.доллар. Та бол энэ цаг үеийн хамгийн агуу тамирчдын нэг. Хамгийн үзэсгэлэнтэй моделиудтай болзож, зугаацдаг. Энэ бүхэн таны хүүд сөргөөр нөлөөлөх вий хэмээн боддоггүй гэж үү.
-Хүү минь хэтэрхий балчир байна. Хүү минь ааваасаа өөр хэнд ч итгэдэггүй. Би бол хүүгийнхээ сайн тал. Яг одоо хүүгийнхээ төлөө амьдарч байна. Шагнал авч, нэр минь хэвлэлээр гарах болгонд надтай нөхөрлөхийг хүсэх хүмүүсийн тоо хэдэн зуу дахин нэмэгддэг.
-Кристиано Жр таван настай. Таныг тоглолт эсвэл бусад шалтгаанаар гэртээ хонохгүй үед цагийг хэрхэн өнгөрүүлдэг бол. Та хүүдээ хэр анхаарал тавьдаг вэ?
-Хүү минь ээжгүй учир ихэвчлэн ганцаараа аавынхаа тоглолтыг үзэж суудаг. Спортод тун дуртай. Хүү их багаасаа биеэ даасан. Би тоглолтгүй үедээ хүүтэйгээ цуг байдаг.
-Биеэ даахад хэтэрхий балчир бус уу?
-Хүүгээ ая тухтай, ганцаардуулахгүй байхын тулд би бүхий л бололцоогоо ашигладаг.
-Та олон бүсгүйтэй нэр холбогдсон. Хүүгээ хэзээ ээжтэй болгох төлөвлөгөөтэй байна?
-Би энэ талаар бодох дургүй. Миний хүүд ээж хэрэггүй. Би хүүгийнхээ сайн сайхны төлөө ээж болдог. Хүүгийнхээ төлөө хоол хийх дамжаанд явсан. Миний хүү ганц удаа ч “ээжээ” хэмээн дуудаж байгаагүй. Энэ бүхэн надад дарамт учруулдаг. Гэхдээ би эр хүн учир хүүгийнхээ өмнө уйлахгүй. Би заримдаа “Хүүд минь ээж хэрэгтэй болов уу”, “Миний хүүд ээжийн хайр хэрэгтэй болов уу” хэмээн боддог. Энэ асуудал миний оюун ухааныг самууруулж, амжилтад минь саад хийдэг. Би ч гэсэн бусад шиг сайхан гэр бүлтэй болохыг хүсдэг. Гэхдээ ... мэдэхгүй юм.
-Та нэг л өдөр хүүхэдтэй болчихсон. Өнөөдрийг хүртэл хүүгийн тань ээж нууц хэвээр байгаа. Та хоёр холбоотой байдаг уу. Ямархуу бүсгүй байдаг вэ?
-Мэдээж хэрэг би тэр бүсгүйн мэдээллийг цацвал хүүд минь сөрөг нөлөөтэй байх. Би хүүгээ хамгаалах үүрэгтэй. 2010 онд миний амьдрал бүхэлдээ өөрчлөгдсөн. Үнэнийг хэлэхэд, надаас нэг эмэгтэй хүүхэдтэй болсон гэж хэлсэн. Нэгхэн өдрийн дотор би хүүтэй болчихсон. Бид удаан хугацааны турш ярилцаж, гэрээ байгуулсан. Би хүүгээ өсгөхөөр болсон. Тохиролцооны дагуу тэр эмэгтэй насан туршдаа үнэнийг нуух ёстой. Хүүтэй болохоосоо өмнө өөрийгөө боддог байлаа. Одоо хүүгээ нэгдүгээрт тавих болсон.
-Та хоёр ихэвчлэн юуны тухай ярилцдаг вэ?
-Жр миний номер нэг фанат. Бүх тоглолтыг минь үзсэн. Бид ихэвчлэн тоглолтын талаар ярилцдаг. Хүү минь “Та ийшээ дамжуулах байсан. Танай тэр чинь өнөөдөр яачихсан юм бэ” гээд л олон асуулт тавиад л хариултаа нэхээд суучихдаг. Өдөр бүр надтай хамт бэлтгэл хийдэг учир үеийнхнээсээ арай өндөр. Таван настай хүүхдүүдээс арай том харагддаг.
-Дахин нэг удаа асуумаар байна. Та хүүгийнхээ төлөө бус өөрийнхөө төлөө гэрлэх бодолтой байна уу?
-Үгүй ээ. Надад гэрлэх бодол байхгүй. Би хүүгээ ганцаараа өсгөмөөр байна. Хүү минь надтай адилхан бодолтой байгаа.
-Хүмүүс таныг нэг бол бага насны охин жирэмслүүлсэн эсвэл тээгч эх ашигласан хэмээдэг. Аль нь зөв бэ?
-Хүмүүсийн бодол надад хамаагүй. Таван жилийн өмнөхийг ингэж ярих нь утгагүй хэрэг. Гэнэт аав болно гэдэг их хэцүү юм байна лээ. Зааварлах хүн байхгүй. Зарим хүмүүс хүүхэд заавал эцэг, эхийн халамжид өсөх ёстой гэдэг. Гэхдээ би эсрэг байр суурьтай байна.
-Таны хүү хөлбөмбөгч болохыг хүсдэг гэлээ?
-Хаалгач болохыг хүсдэг. Их багаасаа спортод сонирхолтой болсон. Сая хүү минь “Ааваа, би “Реал Мадрид” багийн хаалгач болно” гэж хэлсэн. Би юу ч хэлээгүй “За” л гэсэн. Бодол нь өөрчлөгдөөсэй хэмээн найдаж сууна. Тамирчин болох тийм ч амар биш.
-Таны сэтгэлийг хамгийн их зовоодог зүйл?
-Зовоох зүйл гэхээсээ илүү шаналах зүйл байдаг. Намайг 20 настай байхад аав минь согтууруулах ундаа хэтрүүлэн хэрэглэж амиа алдсан. Би ууж байхдаа аавынхаа тухай бодож, хүүгээ хамгаалж чадахгүй амиа алдах вий дээ хэмээн эмээдэг. /Уйлав/ Нэг мэдэхэд аав минь архинд хамааралтай болчихсон байсан. Би 14 настайдаа спортын карьерээ эхлүүлсэн. Амжилт байгуулахаар хөдөлмөрлөж байхад аав минь огт анхаарал хандуулдаггүй байлаа. Ааваас магтаалын үг сонсохыг мөрөөддөг байсан. Би тийм ихийг хүсээгүй. Зүгээр л “Хүүгээрээ бахархаж байна” гэх үгийг сонсохыг хүссэн.
-Нэг зүйлийг лавламаар байна. Танаас жирэмсэн боллоо хэмээн нэг бүсгүй ирэхэд та түүнийг үр хөндүүлэхийг зөвлөсөн гэсэн. Энэ үнэн үү?
-Тиймээ. Би юу ч бодолгүйгээр түүнийг үр хөндүүлэхийг зөвлөсөн. Гэхдээ цаг хугацааны эрхээр миний хүсээгүй хүүхэд надад баяр баясгалан өгч байна.
-Алдартай болох ...?
-Би зураг авалтад орох их дуртай. Цээж нүцгэн зургаа даруулах их дуртай шүү.
-Яагаад баримтад киногоо гаргахыг хүсэв?
-Миний хувийн амьдралыг сонирхдог хүмүүс их бий.