Орон сууцны үнэ нэг сарын хугацаанд 0.45 хувиар буурч, борлуулалт нэмэгджээ
Уншсан 2039 vote 0 2014.11.08 13:56:22Монголбанкны захиалгаар орон сууцны үнийн индексийг үл хөдлөх хөрөнгийн “Тэнхлэг зууч”, “Актив зууч”, “Монголиан пропертис” компаниудын консорциум, Эдийн засгийн судалгаа, эрдэм шинжилгээний хүрээлэн хамтран сар тутам гаргадаг болсон билээ.
Тэд өнгөрсөн сарын байдлаарх дүн мэдээг танилцуулах хурал өнөөдөр Монголбанкны байранд боллоо. Эдийн засгийн судалгаа, эрдэм шинжилгээний хүрээлэнгийн судлаач З.Манлайбаатар, “Тэнхлэг зууч” компанийн захирал Б.Батзориг нар оролцлоо.
Амьдран суух зориулалттай үл хөдлөх хөрөнгийн үнийн өсөлтийг хэмжих ерөнхий үзүүлэлтийг орон сууцны үнийн индекс гэж тодотгоно. Энэ нь тухайн сард зарагдсан орон сууцны үнийн дундаж үзүүлэлтээс ялгаатай юм байна. Орон сууц бүр чанар, байршлын хувьд өөр байдаг учир эдгээр чанарын ялгааг нь хасч, цэвэр үнийн өсөлтийг авч үздэгийг Эдийн засгийн судалгаа, эрдэм шинжилгээний хүрээлэнгийн судлаач З.Манлайбаатар тайлбарласан юм.
Орон сууцны үнийн индекст 44 мянган айлын шинэ, хуучин орон сууцны үнийг хамруулсан бөгөөд тус судалгаагаар есдүгээр сарын байдлаар өмнөх сарынхаас орон сууцны үнэ 0.45 хувиар буурсан бол оны эхнээс 4.3 хувь, жилийн өмнөхөөс 11.17 хувиар өссөн байна. Борлуулалтын хувьд, өнгөрөгч есдүгээр сарыг өмнөх сарынхтай харьцуулахад хуучин орон сууцных 15 хувь, шинэ орон сууцных 40 хувь, хашаа байшингийн борлуулалт 100 хувиар нэмэгдсэн талаар албаныхан мэдээлэв.
Орон сууцны үнэ цаашдаа тогтворжих хандлагатай гэв
1970-аад оноос хойш хөгжингүй орнуудад тохиолдсон санхүүгийн зах зээлийн хамгийн том хямралууд бүгд үл хөдлөх хөрөнгийн зах зээлийн гажуудал буюу үнийн хөөсрөлөөс үүдэлтэй байжээ. Тиймээс үл хөдлөх хөрөнгийн үнийн өөрчлөлтийг цаг алдалгүй, үнэн зөв хэмжих асуудалд бодлого боловсруулагчид, санхүү, бизнесийн байгууллагынхан онцгой анхаарлаа хандуулах болсон байна.
Мөн хэрэглээний үнийн индекс буюу инфляцийн тооцоонд орон сууцны үнийн өсөлтийг оруулж тооцдоггүй учраас үүнийг заавал тусад нь тооцох хэрэгтэй ажээ. Орон сууцны үнийн индекс ямар байх нь эдийн засгийн бүхий л салбаруудад тодорхой хэмжээгээр нөлөөлдөг байна. Тэгвэл сүүлийн үед орон сууцны индексээр илэрхийлэгдэх үнэ бага багаар буурч байгаа бөгөөд цаашдаа тогтворжих хандлагатайг Үл хөдлөх хөрөнгийн “Тэнхлэг зууч” компанийн захирал Б.Батзориг хэлж байсан юм. Ингэж орон сууцны үнэ тогтворжвол дээр хэлсэнчлэн эдийн засгийн байдал ч түүнтэй шууд хамаарлаар тогтворжих боломж бүрдэнэ гэж албаныхан үзэж байна.