Өнгөрсөн сард олны анхаарлыг татсан дуулианы нэг нь Тайландын Ерөнхий сайд асан Таксин Чинават Монголд орогнож байна гэсэн мэдээлэл байсан.
Түүнийг Монголоос явлаа гэсэн мэдээлэл тухайн үед гарч байсан ч өчигдөр зарим нэг сайтад IV хороололд байрлах “White house” зочид буудлаас гарч байгаа зургийг тавьжээ.
Тус буудлын хүлээн авагчтай холбогдон энэ талаар тодруулахад “Манай буудалд ийм нэртэй хүн буугаагүй. Энэ талаар өнөөдөр маш олон хүн асууж, зарим нь ирж уулзсан. Манай буудлыг андуурсан юм шиг байна” гэв.
Сарын өмнө Монголд байхад нь түүнийг цагдаагийн хамгаалалтад байлгасан гэсэн мэдээллийг ч баттай эх сурвалж үгүйсгэж байна.
Гаалиар шалган нэвтрүүлсэн иргэдийн дунд Таксин Чинаватын нэр байгаа эсэхийг тодруулсан боловч хариу өгөхөөс татгалзсан юм.
Сарын өмнө нэр нь тодорхой бус буудалд байхад нь Японы парламентын гишүүн Сүзүки түүнтэй уулзсан талаар арлын орны хэвлэлүүдэд бичиж байсан юм.