Өсвөр үеийн хүүхдийн спортын анхдугаар олимпийн наадмын тэнгэрт эх орныхоо алтан соёмбот далбааг мандуулж, алтан медаль энгэртээ зүүсэн Б.Батцэцэг, Г.Эрдэнэболд нарын 14 сурагчийг Улаанбаатар хотын захирагч Г.Мөнхбаяр өчигдөр хүлээн авлаа. Хотын мээр эх орныхоо нэрийг дэлхийд дуурсгаж яваа авьяаслаг хүүхдүүдэд гарын бэлгээ гардуулахын зэрэгцээ тэднээр бахархаж байгаагаа хэлсэн юм.
Тэрбээр хүүхдүүдэд хандан “Та бүхэн үе тэнгийнхнийхээ үлгэр дуурайл юм шүү. Цааш даа улам олон тэмцээн уралдаанд эх орон, төрөлх хотынхоо нэрийг улам өндөрт гаргаж яваарай. Хүүхдүүд та бүхнээр бид бахархаж байна” гэв. Энэ жил олон улсын чанартай тэмцээн, уралдаанд нэгдүгээр сургуулийн сурагчид бусдыгаа хошуучилжээ. Хотын мээрийн хүндэтгэлийн ёслолд нэгдүгээр сургуулийн дөрвөн сурагч хүрэлцэн ирсэн юм.
Сингапурт зохиогдсон хүүхдийн спортын анхдугаар олимпоос алтан медаль хүртсэн Б.Батцэцэг, Г.Эрдэнэболд болон Турк улсад зохиогдсон Шатрын спортын өсвөрийн дэлхийн аварга шалгаруулах тэмцээнээс алтан медаль хүртсэн А.Энхтуул, Бээжинд болсон Өсвөр үеийн шатрын Азийн аварга шалгаруулах тэмцээний алтан медалийн эзэн Д.НоминЭрдэнэ, Францад болсон төгөлдөр хуурын тэмцээний алтан медаль, Буриад улсад зохиогдсон шатрын аварга шалгаруулах тэмцээний алтан медалийн шагналт БЗД-ийн 14 дүгээр сургуулийн хоёрдугаар ангийн сурагч Б.Номин-Эрдэнэ, Макаод болсон Зүүн Азийн хүүхдийн урлагийн их наадам, АНУ-д болсон Олон улсын хүүхдийн урлагийн наадамд Ардын болон цэнгээнт бүжгийн төрлөөр хүрэл медаль хүртсэн нийслэлийн 33 дугаар сургуулийн аравдугаар ангийн сурагч М.Номингийв нарын хүүхдийг хотын мээр өргөмжлөл, зуун мянган төгрөгөөр шагналаа.