Химийн зэвсгээр байлдаж эхэлжээИракийн томоохон хотуудын нэг болох Тикритийг чөлөөлөх тулалдаан ид өрнөж байна. Эвслийн орнуудын агаарын цохилтоор дэмжүүлсэн Иракийн засгийн газрын цэргүүд Тикритийг 75 хувийг хяналтдаа оруулаад байна. Иракийн армийнхан сөнөөгч, бөмбөгдөгч онгоцуудаар агаараас дэмжүүлэхийн зэрэгцээ байлдааны нисдэг тэрэг, танк, хуягт, артиллерийн буунууд ашиглан тулаанд орж байгаа гэнэ. Мөн хүчний харьцаа ч илт давуу байгаа аж. Тикрит хотын үлдсэн 25 хувийг хяналтдаа байлгаж эсэргүүцэн хамгаалж байгаа "Исламын улс"-ын дайчид 150-200 орчим гэж үзэж байгаа бол Иракийн армийн Тикритийн ойролцоох цэргүүд бүгд нийлээд 30 мянга орчим гэнэ. Тикрит хот нь Иракийн удирдагч агсан Саддам Хусейны төрсөн хот гэдгээрээ олонд алдартай бөгөөд ерөнхийлөгчийн эзэмшил, орд эдлэнгүүд оршдог байжээ. Өнгөрсөн онд Тикрит хот "Исламын улс"-ын бүрэн хяналтад орж эзлэгдсэн бөгөөд одоо л ийнхүү эргүүлэн авч байгаа юм. Тикрит хотыг "Исламын улс" томоохон түшиц газраа болгосон бөгөөд толгойлогчид нь энд орогнож байгаа хэмээн Ирак, Сирийн тагнуулынхан удаа дараа мэдэгдэж байсан. Олон улсын шинжээчдийн анхаарлыг татаж байгаа нэг асуудал бол Иракийн армийн зүгээс "Исламын улс"-ын эссрэг химийн зэвсэг ашиглаж эхэлсэн явдал юм. Өнгөрсөн долоо хоногт Мосул хотын төлөөх тулалдаанд, одоо Тикритийг чөлөөлөх тулалдаанд хлорын хий бүхий байлдааны сум, зэвсэг ашиглаж довтолгоонд орж байгаа аж. Энэ хлорын хий бүхий энэ зэвсэглэл "Исламын улс"-ын цэргүүдэд ч байгаа нь батлагдсан бөгөөд Ирак болон Сирийн армийн эзлэгдсэн баазуудаас олзолсон олон төрлийн зэвсэглэлүүдийнх нь нэг юм. Үүний зэрэгцээ Ираны талаас Иракийн армид зэвсэг, хэрэгсэл, сум ханган нийлүүлж эхэлсэн нь засгийн газрын цэргүүдийн сүүлийн үед амжилттай болж буй давшилтад ихээхэн нөлөөлж байгаа юм. Н.Төгс |