Өнгөрөгч баасан гаригт Налайх дүүрэгт долоон залуу уурхайн гүнд дарагдсан ч золоор эсэн мэнд гарсан. Гэтэл гурав хоногийн дараа газар шорооны ажил хийж байсан ах дүүс шороонд дарагдан цаг бусаар ертөнцийг орхилоо.
Н и й с л э л и й н Сонгинохайрхан дүүргийн долдугаар хороо Баянголын 65 дугаар гудамжинд Хилийн цэргийн 0119 дүгээр ангийн ажилчдын байрны бохирын хоолой тавихаар долоон метрийн гүнд хүмүүс ажиллаж байхад хөдөлмөр хамгааллын аюулгүй байдлыг хангаагүйгээс ийм осол гарлаа. Бохирын шугамын нүх авто замын хажууд болохоор машин явахад доргилт үүсэн нурж, ямар ч бэхэлгээ хийгээгүй нь аврах ажиллагаа явуулахад хүндрэлтэй байсан бөгөөд аврагч Х-ын толгой дээрээс чулуу унасан юм байна.
Иргэдийг гаргахын тулд бэхэлгээ хийж, Шуурай бүлэг- 105-ынхан Аврах отряд, Аврах гал унтраах 26 дугаар ангийнхан, нийслэлийн хяналтын Прокурор болон дүүргийн цагдаагийн хэлтсээс нийт 43 хүн ажллаж Э (22 настай, эрэгтэй)-ын цогцсыг 22.40 цагт, Э (34 настай, эрэгтэй)- ын цогцсыг 01.10 цагт гаргажээ. Бүл ах дүүс хувиараа энэ ажлыг хийж байсан гэх анхны мэдээлэл байсан юм. Сонгинохайрхан дүүргийн Засаг дарга Ц.Болдоос орон сууцны бохирын шугамын ажлыг яагаад хувь хүмүүсээр хийлгэснийг тодруулахад “Бидэнд ямар ч хамаагүй. Хилийн цэргийнхэн өөрсдөө хийлгэсэн. Тэндээс асуу” гэж ууртай хариулаад утсаа тасалсан юм. Хилийн цэргийн 0119 дүгээр ангийн захирагч хурандаа Х.Лхагвасүрэнгээс цөөн асуултад хариулт авлаа.
-Танай ажилчдын байрны бохирын хоолойг тавьж байсан хоёр иргэн цаг бусаар нас баржээ. Танайх яагаад хувь хүнээр хийлгэж, хөдөлмөрийн аюулгүй байдлыг нь хангаагүй юм бэ?
-Юуны өмнө тэр хүмүүсийн ар гэрт эмгэнэл идэрхийлье. Манай газар “Цогт зөн билэг” компанитай гэрээ байгуулж ажлаа эхлүүлсэн. Манайх захиалж, тус компани гүйцэтгэгчээр ажиллаж байсан юм. Гэтэл харамсалтай хэрэг гарлаа. Ийм ажлыг хувь хүнээр хийлгэдэггүй гэв. Харин хэргийн газар ажиллаж байсан хүмүүс н.Суубилэг гэдэг хүн хувиараа хүн хөлслөн ажиллуулж байсан гэж ярилаа.
Бохирын шугамын нүх ухаад шороог буруу овоолсноос нурж тэднийг дарсан болохыг онцгойгийнхон хэлж байна. Харин амьд гарсан 20 настай н.Ганбат “Тэд хоолой тавих хөрсөө тэгшлээд дор байсан юм. Харин би арай наахна байсан учир гарч чадсан. Ийм зүйл үзээгүй учир сэтгэл санаа маш хүнд, дарамттай байна” гэв.
Хэргийг Сонгинохайрхан дүүргийн цагдаагийн хэлтэст эрүүгийн хэрэг үүсгэн шалгаж байна. Хөдөлмөр хамгаалалын аюулгүй байдал алдагдсанаас өнгөрсөн жил 22 хүн амь насаа алдсан бол энэ оны эхний найман сарын байдлаар долоон хүн нас барж, 18 хүн гэмтэж хөдөлмөрийн чадвараа алджээ. Улиг болтол ярьж буй хөдөлмөрийн аюулгүй байдлыг хангасан бол цэл залуухан ах дүүс амьд байхсан.
