Үндэсний сагсан бөмбөгийн холбооны супер од Коби Брайант 2006 оны 1 сарын 22-ны өдөр Торонто Рэпторс-ын талбай дээр 81 оноо авч домогт Уилт Чемберлений 100 онооны дараа орох агуу үзүүлэлтэнд хүрч байсан. 37 настай домогт мэргэн бууч Канадын багийн эсрэг нийт 33 тоглохдоо 27 оноо дунджилснаас гадна таван удаа дөчөөс дээш оноо авч чадсан нь мөн л түүхэн амжилт. Зодог тайлахаа зарласан Коби Торонтод хийж буй сүүлийнхээ тулаанд дундаж үзүүлэлтэндээ хараахан хүрсэнгүй, 16 довтолгооныхоо 8-ыг нь амжилттай гүйцэтгэж, 21 оноо авсан, Лэйкерс ч 102-93-ын харьцаатай улирлын 18 дахь ялагдлаа хүлээсэн. Гэвч энэ үр дүн Айр Канада Сентр-ийг дүүргэсэн 20.163 үзэгчид огтхон ч сонин байсангүй, тэд бүгд 20 жилийн хугацаанд гайхамшигт тоглолтоороо тэднийг баясгаж, гомдоож байсан бүх цаг үеийн дэлхийн шилдэг сагсан бөмбөгчдийн нэг Коби Брайантыг үдэн гаргах гэж ирсэн юм. 

Кобигийн зодог тайлалт болон Голден Стэйтийн түүхэн амжилтын сүүдэрт ҮСБХ-ны багууд өрсөлдөөнөө үргэлжлүүлсээр байна. Энэ өдрийн хамгийн сонирхолтой тоглолт Лос-Анжелес Клипперс, Миннесота Тимбервольвс багуудын хооронд өрнөлөө. Тулааны дөрөв дэх үеийн эхэнд талбайн эзэн цөөвөр чононууд 6 оноогоор тэргүүлж, зочид энэ зөрүүг сүүлчийн минут эхлэхэд 3 хүртэл багасгасан. Энэ эгзэгтэй мөчид ДеАндре Жордан, Блэйк Гриффин нар амжилттай довтолсноор Клипперс тэргүүллийг авч, улмаар үлдсэн цагт өрнөсөн чөлөөт шидэлтийн тэмцээнд давуу байдлаа хадгалснаар 110-106-гийн харьцаатай ялалт байгууллаа. Жордан 20 оноо, 12 самбартай багаа тэргүүлж, Блэйк Гриффин мөн адил дабл-дабл хийсэн гэмтлээс эргэн ирсэн Крис Пол 14 оноо авч таван ассист гүйцэтгэснээр Клипперс улирлын 12 дахь хожлоо авлаа. Талбайн эздээс Зэк Лавин 21, Карл-Энтони Таунс 18 оноо тус тус авч, тэдэнд Рики Рубио 16 оноо, 7 ассист нэмэрлэсэн хэдий  ч багийн лидер Эндрью Уиггинс хангалтгүй тоглолт үзүүлснээр багаа улирлын 12 дахь хожигдлоос аварч чадсангүй.