ОХУ-д төлөх Монголын өрийн асуудлаар хоёр улс харилцан тохиролцоонд хүрлээ хэмээн ОХУын Сангийн яамны орлогч сайд Дмитрий Панкин Вашингтонд болж байгаа Олон улсын валютын сан, Дэлхийн банкны намрын чуулганы үеэр мэдэгдсэн байна. Тэрбээр “Бид өрийн асуудлаар ярилцан тохиролцсон. Хэдийгээр гэрээ хэлэлцээр байгуулаагүй ч энэ асуудлыг дууссан хэмээн үзэж болно” гэж сэтгүүлчдэд мэдэгдсэн байна.
ОХУ-ын Сангийн сайд Алексей Кудрин Вашингтон явахаасаа өмнө энэ талаар Монголын талтай тохиролцсон гэнэ. Түүний хэлснээр монголчууд Орост 180 сая доллар төлөх ёстой бөгөөд энэ нь Монголын нийт өрийн дөнгөж хоёр хувь аж. Үлдсэн өрийг 2003 онд тэглэсэн гэж тэрбээр ярьжээ. Энэхүү 180 сая доллар нь Монгол Оросын хамтарсан “Монголросцветмет” нэгдэлд Монгол Улс оролцохдоо зээлсэн мөнгө гэж тэр тайлбарлаад тус нэгтгэлийн Монголын талын орлогоос суутгаж авснаар барагдуулна гэжээ.