Нийслэлийн Баянгол дүүрэгт амьдардаг нэгэн айлаас 200 гаруй сая төгрөгөөр үнэлэгдэх эртний хөөрөг болон их хэмжээний мөнгө хулгайлсан хэрэг гарлаа. Тус дүүргийн цагдаагийн хэлтсийн нэг ажилтан “Баянгол дүүргийн IV хорооны Гаалийн ажилчдын байранд оршин суугч Д-ынхаас алтан нуухтай эртний хийцийн 18 ширхэг мана, гартаам, чүнчигноров хөөрөг алдагдсан.

Гэмт этгээд гэрт нь түлхүүр тааруулан орж, улмаар төмөр шүүгээг нь эвдэн хөөрөг болон 10 мянган доллар, 140 мянган юань, 10 сая төгрөг хулгайлсан. Бид Эрүүгийн цагдаагийн газар, Улсын мөрдөн байцаах газрын ажилтнуудтай хамтран эрэн сурвалжилж байгаа ч одоогоор эзэн холбогдогч нь тог тоогдоогүй” гэв. Уг мэдээллийн дагуу Гаалийн ажилчдын байранд очлоо.

Тус байрны III давхарт хохирогчийнх амьдардаг аж. Эл орон сууцны нэг давхарт дөрвөн айл байдаг бөгөөд давхар цоожтой, шилэн хаалгатай юм. Гэрийн эзэн Д-тай уулзахад “Ах нь одоогоор мэдээлэл өгөхгүй. Тэгээд ч цагдаа нар хэвлэлийнхэнд ямар нэгэн зүйл яриад хэрэггүй гэж хэлсэн болохоор ярилцлага өгмөөргүй байна” гэлээ. Орцны жижүүр эмэгтэйтэй уулзахад “Манай байранд 24 айл оршин суудаг. Би гараашаа давхар хариуцаж, ажиллуулдаг юм.

Намайг гараашийн хаалга хаахаар гараад явсан хойгуур хулгайч түлхүүр тааруулж орсон юм шиг байна лээ. Надад тухайн үед сэжигтэй хүн харагдаагүй. Эд зүйл нь алга болсон айлын эзэд их тохитой хүмүүс байдаг юм” гэхээс илүү зүйл ярихыг хүссэнгүй. Уг байрны өөр нэг оршин суугчтай уулзахад “Өнгөрсөн баасан гаригт цаг даагийнхан ирээд л бөөн юм болж байсан. Тэгээд айл айлаар орж сэжигтэй хүн харагдсан уу, ямар нэгэн дуу чимээ сонссон уу гээд асууж явсан.

Тэр өдөр гэрийн эзэн, эзэгтэй нар хөдөө явсан, хүүхдүүд нь хичээлдээ явсан хойгуур хулгайч түлхүүр тааруулж орсон юм билээ. Уржигдар цагдаагийнхан тэднийхээс эвдсэн төмөр шүүгээг нь аваад явсан. Хулгай хийсэн хүмүүс төмөр тасдагч багажтай ирсэн бололтой, төмөр шүүгээний ар талыг дугуйлан цоолсон байгаа нь харагдсан. Түүгээр ч зогсохгүй ул мөр үлдээхгүй гэж бодсоных ч юм уу, үүдэнд нь байсан шалны алчуурыг нь авч явсан байна гэсэн” хэмээлээ.

Цагдаагийн өөр нэгэн эх сурвалжаас авсан мэдээллээр гэмт этгээдийн ул мөр, гарын хээг бэхжүүлж авсан гэнэ. Харин хохирогчийн хувьд “Нарантуул” худалдааны төвд нэлээд олон жил эртний үнэт эдлэл борлуулж байгаа ченж аж.

www.mongolnews.mn - Эх нутгийн чимээ