Жилийн өмнө Буриадын телевизийн алдарт нэвтрүүлэгч Булат Цыденешиев “АИСТ” телевизийн урилгаар ирж ажилласан билээ. Хэдийгээр ганцхан жил амьдарсан боловч тэрбээр манай орныг шинээр нээн харж чадсан гэнэ.Алдарт нэвтрүүлэгчээ эх орондоо харихад нь долоо хоног тутмын “Информ Полис” сэтгүүлийн газрынхан ярилцлага хийжээ.
-Юуны өмнө амттай мах, ногооноос эхлээд Монголын хоол ундны элбэг дэлбэгт гайхаж байлаа. Дараа нь эндхийн жолооч нарын машин барих арга барилд үнэхээр цочирдсон. Улаанбаатарын архагуудын дэргэд Оросын маршрутын жолооч нар балчир хүүхэд л гэсэн үг. Гэхдээ би удалгүй дасаад тэдэн шиг л давхидаг болсон.
Монголд машин бол морь, зам бол хээр тал гэсэн дүрэм үйлчилдэг гэхэд болно. Мэдээж хэрэг, энэ хоёр онцлогоор л Монголд байнга зорчдог Буриадын уншигчдыг гайхуулж чадахгүй. Түүний анхаарлыг татсан зүйл нь Монголын хэвлэл мэдээллийн газрын хэт олон гэмээр тоо. Булат өглөөний ажлаа сонин уншихаас эхэлдэг байсан гэнэ.
-Монголд “Информ Полис”-шиг чөлөөт хэвлэл олон бий. Миний хамгийн дуртай сонин бол “Өнөөдөр” байлаа. Сөрөг хүчний сонинуудаас “Монголын мэдээ”, “Ил товчоо”, “Хөх толбо”, “Хөх тэнгэр” байна. Тэд улсынхаа Ерөнхийлөгч, хотын дарга нарыг хэрхэн хатуу ширүүн шүүмжилж байгааг уншаад би атаархаж байлаа. Монголд Засгийн газар нь ард түмнээсээ алс хол биш, Сүхбаатарын талбайд Монголын Ерөнхийлөгчтэй тааралдах нь жирийн явдал. Одоо би нутагтаа байгаа ч монгол сонин уншмаар санагдаад болж өгөхгүй юм. Тийм болохоор Монголын том сонинууд унших дуртай. “Өнөөдөр” сониноо цахим хэлбэрээр захиалан уншиж байгаа.
Булатыг хамгийн гайхуулсан зүйл бол “Монгол Ньюс” компани гэнэ. Энэ компанийг нэрт сэтгүүлч Балдорж үүсгэн байгуулжээ.
-“Монгол Ньюс” бол Монголын хамгийн анхны хувийн медиа групп. Энэ компани өдөр тутмын “Өнөөдөр” сониноос гадна спортын “Таван цагариг”, англи хэл дээрх “UB Post”, долоо хоног тутмын “Ням гариг“ сэтгүүл гаргадаг. Ийм компани байгуулах талаар Буриадад зөвхөн мөрөөдөж л болно. Монгол сэтгүүлчид эрхээ хамгаалан ажил хаяж, зарим үед нэвтрүүлэг хийдэггүй. Монгол, Америкийн хамтарсан “Ийгл” телевиз ажил хаяж байж, удирдлагаа сольж байлаа. Манай Орост ингэж чадна гэж төсөөлөхөд ч бэрх. Залуусын дунд хөгжмийн болон ток шоу хийдэг “ТВ9” суваг их нэр хүндтэй. Буриадад ийм суваг дутагдалтай байна. Гэхдээ удахгүй манайд ч Монгол шиг үг хэлэх эрх чөлөөтэй болно гэдэгт итгэж байна.