Мэргэжлийн сургалт үйлдвэрлэлийн төвийн үйл ажиллагааг боловсронгуй болгох зорилгоор эдгээр төвийн удирдлага салбарын яамныхны хамтарсан уулзалт өчигдөр боллоо. Манайд мэргэжилтэй ажилтан бэлтгэх 63 байгууллага ажиллаж байна. Эдгээрт 2009-2010 хичээлийн жилд 44.6 мянган сурагч элсэн орсон бол ирэх жил энэ тоо 50.3 мянгад хүрэх тооцоо хийжээ.
Мэргэжилтэй ажилтны ажлын байрны зах зээлийн эрэлт хэрэгцээ жил ирэх тусам нэмэгдэж байгаа энэ үед төр хувийн хэвшлийн түншлэлийг сайжруулах, хөдөлмөрийн зах зээлийн эрэлт, нийлүүлэлтийн судалгаа хийх зэргээр шинэ тогтолцоог бүрдүүлэхэд тэд гол анхаарлаа хандуулсан. Мэргэжилтэй ажилтны хөдөлмөрийн зах зээлийн судалгааг ойрын гурван жилээр гаргавал төр болон хувийн хэвшлийнхэнтэй түншлэн ажиллахад хялбар болох юм. Үүнийг дагаад элсэлт, хөрөнгө оруулалт, багш бэлтгэх бодлогоо зохицуулна.
Мөн хувийн хэвшлийнхэнтэй боловсон хүчин нийлүүлэх, тэднээс үйл ажиллагаагаа сайжруулахад дэмжлэг авах чиглэлээр хамтарч ажиллахын чухлыг БСШУЯ-ны Төрийн нарийн бичгийн дарга Б.Мишигжав хот, хөдөөгийн мэргэжлийн сургалт үйлдвэрлэлийн төвийн удирдлагуудад сануулав. Баян-Өлгий аймгийн Мэргэжлийн сургалт үйлдвэрлэлийн төвийн захирал Ш.Махсут “Манайх 1290 оюутныг 14 чиглэлийн мэргэжлээр бэлтгэж байна.
Сургалт явуулах дадлагын байр шаардлага хангахгүй, тоног төхөөрөмж нь орчин үеийн техник технологоос хоцрогдсон” гэв. Ийм зовлонтой сургалтын төв хот, хөдөөд олон бий. Мэргэжлийн сургалтыг хэдийгээр төрөөс дэмжиж байгаа ч бүх бэрхшээлийг нэг дор шийдэх амаргүй. Тиймээс хувийн хэвшлийнхэнтэй түншилж, тэднээс хөрөнгө босгохыг зөвлөж байсан. Хоёр өдөр үргэлжлэх энэ уулзалтаар хөдөлмөрийн зах зээлийн судалгаа хийх, сайн ажилласан багшийг урамшуулах тогтолцоо бий болгох зэрэг бодлогын зохицуулалт хийхээр төлөвлөжээ.