Үзэгчдийн дунд багагүй хүлээлт үүсгэж, үндэсний урлагаа дээдэлсэн тоглолт хийнэ хэмээн амлаад байсан “Sweetymotion” хамтлагийнхан өнгөрөгч 19, 20-нд “Аса” циркт “Number one” тоглолтоо сонирхууллаа. Ардын хөгжмийн “Бөртэ” хамтлагийн аялгуугаар эхэлж, үндэсний онцлог шингээн найруулгыг нь өөрчилсөн дуунуудаар үргэлжлэн, ҮДБЭЧ-ын уран бүтээлчдийн бүжиг, “Торго” салоны загвар зохион бүтээгчдийн урласан үндэсний хувцсаар гоёж “Үйлчин” бүсгүй дуугаараа үзэгчдийн сонорыг мялааснаас нь харвал амласандаа хүрэх гэж багагүй хичээсэн нь илт.
Барууны хөгжимчид болон Америкийн хөгжмийн ертөнцөд цахиур хагалж буй дуучин Крис Браун, Сиара нарын тоглолтод бүжиглэдэг залуусыг урьж, үндэсний урлагийн өнгө төрхийг илэрхийлсэн тоглолтоо барууны шоутай хэрхэн хослуулахыг нь харахаар “Харанга”- ынхан, гавьяат жүжигчин Т.Ариунаа тэргүүтэй рок попын “Акулууд” ч хүрэлцэн ирсэн харагдсан.
Баруунд шоу ямар түвшинд хүрснийг эх орондоо сонирхуулж, шилдгийг харуулахаа зарлан, тоглолтоо ч “Number one” хэмээн нэрийдсэн тус хамтлагийнхан эл үдэш 1980-аад оны дуунуудын хөгжмийн найруулгыг орчин үеийн хэв маягт нийцүүлэн өөрчлөн дуулж, үзэгчдийн сонорыг мялааснаас гадна Америкийг зорихоосоо өмнө хийсэн уран бүтээл болон дөрөв дэх цомгийн шинэ уран бүтээлүүдээ ч хүргэв.
Хөг хэмнэлтэй дуунуудаа америк бүжигчдийн өвөрмөц дэглэлттэй хослуулж, үндэсний хэв маяг бүхий уран бүтээлээ ҮДБЭЧ-ын хамт олонтой хамжсан тус хамтлагийн тоглолтын чимэг нь хөгжмийн зохиолч Б.Чинбатын тоглосон “Жалам хар” байсан гэдэгтэй мэтгэх хүн үгүй биз.