Эрвээхэй нүдэн Чио Чио Саны эмгэнэлт хувь заяаны түүхийг өгүүлэх Ж.Пуччинийн “Чио Чио сан” дуурь энэ бямба гаригт ДБЭТ-ын тайзнаа тавигдана. Үнэнч хайр дурлалтайгаа учирлаа хэмээн эндүүрсэн балчир охин хэвлийдээ хүүгээ тээн эр нөхөртөө хаягддаг.
Эцэст нь хайртай залуу Пинкертон нь төрүүлсэн ганц хүүг нь аваад нутаг буцахад Эрвээхэй хатагтай амиа хорлон амьдралаа дуусгадаг юм. Хоёр бүлэг, гурван үзэгдэлт эл дуурийн цомнолыг Л.Иллика, Ж.Жазока нар бичжээ. Манай тайзнаа 1967 онд анх тавигдаж, тайзны зураачаар ардын зураач Л.Гаваа, Ч.Гунгаасүх нар ажиллажээ. Энэ жил ДБЭТ үзвэрийн нээлтээ “Чио Чио Сан” дууриар хийснийг уншигч та санаж буй биз ээ.
Тэр тоглолтыг Италийн удирдаач Роберто Салвалаио дохисон. Харин бямба гаригийн тоглолтыг Н.Туулайхүү удирдах аж. Гол дүрд Б.Эрдэнэтуяа гоцолж, Сузукид Р.Доржхорлоо, Пинкертон Г.Шижирболд, Шарплест гавьяат жүжигчин М.Болд нар дуулна.