Мэнни Пакьяаог зууны тулаанд ялж, бүх 48 тоглолтондоо ялсан Флойд Мэйвийдэр ирэх 9-р сард дахин боксын рингнээ гарахаар болжээ. Түүний өрсөлдөгч нь Андрэ Бэрто. Цагтаа WBA-н хагас хөнгөн жингийн дэлхийн аваргаар 2 ч удаа шалгарч байсан 31 настай Америк боксчинийг ялбал Флойд 49 тулаандаа бүгдэд нь ялж, домогт Роки Марчианогийн түүхэн амжилттай зэрэгцэх юм. Тулаан 9-р сарын 12-ны өдөр АНУ-ын Лас Вегас хотод Эм-Жи-Эм гранд гардэн ордонд болохоор төлөвлөгджээ. Энэ тухай анх Флойд олон нийтийн сүлжээнд зарлаж “Түүхийн нэг хэсэг бологтун. Одооноос зочид буудлаа захиалаарай” гэж бичсэн байна.

Араатан хочтой Берто нь мэргэжлийн бокст 33 тулаан хийж 30-д нь ялалт байгуулсан хэдий ч сүүлийн зургаан тулааныхаа гуравт нь ялагдсан байна. Уг нь Британийн боксчин Амир Хантай тулалдах байх гэсэн хүлээлт их байсан ч Флойд Хайти гаралтай Америк боксчиныг сонгосон нь амжилтаа ахиулах зорилго гэж хүмүүс хардаж байгаа юм. Амир Хан өнгөрсөн 6-р сард Крис Алжиериг ялж 31 дэх ялалтаа байгуулсан билээ.

WBA, WBC болон Ring-ийн хагас хөнгөн жингийн дэлхийн аварга цолтой Флойд Мэйвийдэр энэхүү тулаанаас хамгийн багадаа 35 сая доллар авах тохироо хийжээ. Андрэ Бертотой хийх тулаанаар 2013 онд showtime-тай байгуулж байсан 6 тулаан хийх гэрээ нь өндөрлөж байгаа юм.