Улсын аварга Дагвацэрэнгийн Хадбаатар
Төв аймгаас Ардын төрийн наадмаар тодрон мандсан 2 дахь аварга бол Төв аймгийн Угтаал сумын харьяат Д.Хадбаатар юм. Бага балчир наснаасаа өсгөлүүн том биетэй байсан ирээдүйн аваргыг 1967 онд түүний нагац эгч, гавьяат тамирчин Д.Намжилмаа тамирчин болгохоор хотод дагуулсан ирснээр бөх болох гараа нь тавигджээ. Тэрээр 1970 онд Ардын армийн цэрэг болсон тэр цагаас хойш “Алдар” нийгэмлэгийн тамирчин болж байжээ. Ингээд Д.Хадбаатар 1972 оны Улсын наадамд Ж.Чойжилсүрэн арслангаар 5 давж начин цол хүртсэн. 1975 онд Д.Долгорсүрэнгээр 7 давж улсын заан цол, 1976 онд П.Дагвасүрэн арслангаар 9 даван түрүүлж арслан цол хүртсэн бол 10 жилийн дараа дахин түрүүлж улсын аварга цолыг хүртэж байжээ. 1972 оны Улсын баяр наадамд залуу бөх Д.Хадбаатар улсын начин цол хүртсний зэрэгцээ зээрэнцэг шидэлтээр спортын мастер болж, бөөрөнцөг түлхэлтээр улсын рекорд тогтоож байсан. Д.Хадбаатар аварга үндэсний бөхөөр барилдахын зэрэгцээ самбо бөхөөр барилдаж, бас хөнгөн атлетикийн тамирчин байсан.
Улсын наадамд:
- 1972 онд 512 бөхөөс Ж.Чойжилсүрэн арслангаар 5 давж начин
- 1973 онд 512 бөхөөс О.Пүрэвээр 5 давсан
- 1975 онд 512 бөхөөс Д.Долгорсүрэнгээр 7 давж заан
- 1976 онд 512 бөхөөс П.Дагвасүрэн арслангаар 9 даван түрүүлсэн
- 1977 онд 512 бөхөөс Д.Батбаяраас 6 давсан
- 1978 онд 512 бөхөөс Ч.Гочоосүрэнгээр 5 давсан
- 1979 онд 512 бөхөөс Х.Баянмөнх аваргад унаж үзүүрлэсэн
- 1983 онд 512 бөхөөс Д.Цэрэнтогтох аваргад унаж үзүүрлэсэн
- 1984 онд 512 бөхөөс Ө.Тулгаагаар 7 давсан
- 1985 онд 512 бөхөөс Б.Ганбаатарт унаж үзүүрлэсэн
- 1986 онд 512 бөхөөс Д.Цэрэнтогтох авараар 9 даван түрүүлсэн