“ОХУ-ын Тувагийн төлөөлөгчийн газар удахгүй Улаанбаатарт үүдээ нээнэ. Энэ талаар нийслэлийн Засаг даргын орлогч Н.Гантөмөртэй ярилцаж тохирлоо” гэж Тувагийн Гадаад харилцааны газрын захирал Чылгычы Ондар энэ сарын 14-нд мэдэгдлээ. Төлөөлөгчийн газар энэ оны гуравдугаар сард Улаанбаатар хотод хуучин “Аэрофлот” компанийн байранд үйл ажиллагаагаа эхлэх юм. Ингэснээр ТуваМонголын эдийн засаг, худалдаа, соёл, шинжлэх ухааны хамтын ажиллагааны хөгжилд том дэвшил гарахаас гадна Хятадтай харилцахад ойр дөхөм болно гэж тус газар үзэж байна. Чылгычы Ондар айлчлалаараа нийслэлийн удирдлагатай уулзсанаас гадна Увс аймгийн ЗДТГ-ын шинэ дарга Г.Болор-Эрдэнэтэй уулзаж, Тувад чулуун нүүрс нийлүүлэх талаар ярилцсан байна.